जोंधरी (मक्का) बनिस मुनाफा के खेती : महिला समूह मन ह राज्य म सामूहिक खेती के परम्परा ल पुर्नजीवित करिन

रायपुर, 11 जुलाई 2020। छत्तीसगढ़ म मक्का के खेती के रकबा म तेजी ले बढ़ोतरी होए लगे हे। किसान मन के रूझान एखर कोति बाढ़े हे। एकर मुख्य कारण शासन कोति ले मक्का के खेती ल देहे जात प्रोत्साहन अउ समर्थन मूल्य म खरीदी हे। राजीव गांधी किसान न्याय योजना ह मक्का के खेती ल लेके किसान मन के उत्साह ल अऊ बढ़ा देहे हे। एकरे सेती छत्तीसगढ़ राज्य म ये साल खरीफ म मक्का के खेती के रकबा म करीबन 50 हजार हेक्टेयर के वृद्धि होए हे। बीते साल राज्य म दू लाख 80 हजार 850 हेक्टेयर म मक्का के खेती होए रहिस। ये साल एकर रकबा बाढ़के करीबन 3 लाख 30 हजार हेक्टेयर होए के अनुमान हे। छत्तीसगढ़ राज्य म सुराजी गांव योजना शुरू होए के बाद ले सब्जी के सामूहिक खेती के शुरूआत के बाद अब महिला समूह मन ह मक्का के सामूहिक खेती घलोक शुरू कर देहे हें। मक्का के सामूहिक खेती होना मक्का के खेती के प्रति मनखे मन के बाढ़त रूझान के संकेत हे। मक्का कम लागत म उपजइया बारहमासी फसल ये। छत्तीसगढ़ राज्य के बस्तर अंचल अऊ सरगुजा म मक्का के खेती बड़ पैमाना म होए लगे हे।