कबीरधाम, 13 जुलाई 2020। छत्तीसगढ़ के वनक्षेत्र मन अऊ पहाड़ी इलाका मन के गांव सौर उर्जा ले अब जगमगाए लगे हे। मुख्यमंत्री श्री भूपेश बघेल के निर्देशन म छत्तीसगढ़ राज्य अक्षय ऊर्जा विकास अभिकरण क्रेडा कोति ले राज्य के अइसन इलाका जिहां विद्युत लाइन पहुंचाए म दिक्कत आवत हे उहां सौर ऊर्जा के माध्यम ले बिजली पहुंचाए के काम करे जात हे। सौर उर्जा ले ए क्षेत्र मन के मनखे मन के जीवन म तरक्की के नवा रद्दा खुलत हे। सौर उर्जा ले ए इलाका मन म किसान मन ल सिंचाई सुविधा मिलत हे। उहें स्वास्थ्य सुविधा मन म इजाफा होए हे।
कबीरधाम जिला म बोड़ला अउ पंडरिया विकासखण्ड संग आन बैगा बाहुल गांव मन म कार्य योजना के तहत उहां सौर ऊर्जा के पावर प्लांट लगाए जात हे। योजना के तहत क्षेत्र म 51 सोलर पावर प्लांट के माध्यम ले 47 स्थल मन म विद्युतीकरण के काम करे गए हे। इहां करीब 600 यूनिट बिजली के रोजेच उत्पादन होवत हे, जेखर से इहां के जंगल अउ दुर्गम पहाड़ी मन म स्थित उप स्वास्थ्य अउ प्राथमिक स्वास्थ्य केन्द्र मन म बिजली के आपूर्ति करे जात हे। एखर अलावा उहां निवासरत बैगा आदिवासी परिवार मन ल सोलर होम लाइट प्रदान करके ऊंखर घर मन ल रौशन करे के काम क्रेड़ा कोति ले करे गए हे।
