शराब दुकान म पुलिस ह मारिस छापा, बोतल म पानी भरत कर्मचारी ल रंगे हाथ करिन गिरफ्तार

कोरिया, 15 जुलाई 2020। जिला के झगराखांड थाना क्षेत्र के खोंगापानी के शासकीय अंग्रेजी शराब दुकान म पुलिस ह छापा मार के बड़का कार्रवाई करे हे. बताये जावत हे कि खोंगापानी के शासकीय अंग्रेजी शराब दुकान म बीते कई दिन ले शराब के बोतल मन म पानी भर के बेचे के शिकायत पुलिस ल मिलत रिहिस हे. पुलिस ह मुखबिर के सूचना म आज बिहनिया शराब के दुकान म छापा मारिस. मउका म शराब दुकान के कर्मचारी मन द्वारा प्लास्टिक के बोतल म शराब भरत रिहिस, अउ शराब के बोतल म पानी भरत हुए रंगे हाथ गिरफ्तार कर ले गिस. कोरिया पुलिस ह आबकारी विभाग के अधिकारी मन ल मामला के जानकारी दे के मउका म आबकारी विभाग के अधिकारी मन ल बुलाइस. फिलहाल पूरा मामला के जांच आबकारी अउ पुलिस विभाग करत हे.