मुख्यमंत्री ह खुदे गौठान समिति के गोबर खरीदी रजिस्टर म एंट्री करिन: बेचइया किसान मन ल गोबर बिक्री कार्ड भेंट करिन
मुख्यमंत्री निवास म पारंपरिक रीति-रिवाज के संग मनाए गीस हरेली के तिहार
रायपुर, 20 जुलाई 2020। मुख्यमंत्री श्री भूपेश बघेल ह हरेली परब म आज अपन निवास म चार किसान मन ले 48 किलो गोबर के खरीदी करिन अऊ किसान मन ल दू रूपिया के हिसाब ले 96 रूपिया के भुगतान करके गोधन न्याय योजना के प्रदेशव्यापी शुरूआत करिन। ये किसान रायपुर जिला के अभनपुर विकासखण्ड के ग्राम नवागांव ले आए रहिन। मुख्यमंत्री ह नवागांव गौठान समिति के जय छत्तीसगढ़ महिला स्व-सहायता समूह बर नवागांव के श्री कृष्ण कुमार चक्रधारी, पीलू राम ध्रुव, सेवक राम साहू अऊ शिव नारायण साहू ले गोबर खरीदिन। मुख्यमंत्री ह खुदे गौठान समिति के रजिस्टर म गोबर खरीदी के मात्रा घलोक दर्ज करिन अऊ गोबर बेचइया किसान मन ल गोबर बिक्री के कार्ड भेंट करिन। बेचइया किसान मन ल देहे गए कार्ड म ऊंखर बेचे गोबर के मात्रा दर्ज करे जाही।
मुख्यमंत्री निवास म अभनपुर ले आए ए किसान मन ह ‘गोधन न्याय योजना‘ चालू करे बर मुख्यमंत्री के प्रति आभार प्रकट करत कहिन के ये योजना किसान अऊ छोटे पशुपालक मन बर बहुत अच्छा योजना हे। श्री चक्रधारी ह बताइस के वोखर तिर पांच मवेशी हे। रोजेच करीबन एक झउहा मने 20 किलो तक गोबर निकलथे, जऊन कचरा म जात रहिस। अब एखर बिक्री होए ले हमार जइसे हजारों मनखे मन ल एकर लाभ मिलही।
आज मुख्यमंत्री निवास म पारंपरिक रीति-रिवाज के संग हरेली के तिहार तको मनाए गीस। हरेली परब म परंपरा हे के किसान अऊ ऊंखर परिवार के महिला मन अपन खेत अऊ बाड़ी के साग-भाजी अपन सियान मनखे मन ल भेंट करथें। जय धरती मां महिला स्व-सहायता समूह के अध्यक्ष श्रीमती दुर्गा बाई चक्रधारी संग श्रीमती लक्ष्मी धु्रव, श्रीमती आरती साहू संग समूह के महिला मन ह मुख्यमंत्री श्री बघेल ल साग-भाजी भेंट करिन। लौकी, रमकेलिया, कोहड़ा, बरबट्टी, करेला, तरोई संग चेचभाजी, पटवा भाजी, अमारी भाजी के गुलदस्ता बनाके भेंट करे गीस। महिला मन ह अपन बारी के जोंधरी घलोक मुख्यमंत्री ल भेंट करिन।
