- हर संक्रमित मेर सबले पहिली पहुंच के बढ़ावत हे हौसला
- मुख्यमंत्री के विडियो संदेश ले होइस उत्साह के संचार- पायलेट श्री राजेश
नारायणपुर, 22 जुलाई 2020। देश म कोरोना संक्रमित मन के बाढ़त ग्राफ ले न सिरिफ मनखे मन के चिंता बाढ़त हे, भलुक आसपास त को डर के वातावरण घलोक बनत हे। ये माहौल के बीच कुछ मनखे अइसन घलोक हें, जऊन कोरोना संक्रमित मन के बेहद करीब रहिके घलोक उंखर से डेराए के बलदा मा उंखर हौसला बढ़ावत हे। जिला चिकित्सालय नारायणपुर के एम्बुलेंस पायलेट (ड्रायवर) श्री राजेश ह जानो वो कोरोना वारियर्स मन म सामिल हे, जेमन पॉजटिव पाए गए हर मरीज तीर सबले पहिली पहुंचके ओ मन ल अस्पताल पहुंचाथे। राजेश ह नारायणपुर जिला के 25-30 कोरोना पॉजिटिव मरीज मन ल घर ले कोविड केयर सेंटर पहुंचाए हे।
एम्बुलेंस के पायलेट श्री राजेश अउ वोखर सहकर्मि मन ह बताइन के अस्पताल जात बेरा कोरोना संक्रमित मनखे अड़बड़ भयभीत रहिथे। हम एंबुलेंस म उंखर से सकारात्मक चर्चा करके ऊंखर डर ल दूर करे के प्रयास करथन। कोरोना मरीज मन ल बताथन के अब तक कोरोना के सबो मरीज स्वस्थ होके घर लहुट आए हें। राजेश बताईस के जब ओ ह एक पइत एक मनखे ल अस्पताल लेके आवत रहिस जेन मोर ले कम उमर के रहिस ते ह अड़बड़ डेराए रहिस। मैं ह बड़े भाईय के जइसे ओला मया देंव अऊ भरोसा देवाएंव के तैं कुछेक दिन म ही स्वस्थ होके घर लहुटबे। मै ह ओला गाना, कहानी सुनाके ओखर ध्यान बटाएंव अऊ चुटकुला सुनाके ओला हंसायेंव।
एहतियात के संग निभावत हें अपन जिम्मेदारी
पायलट श्री राजेश ह बताइस के जब हम पहिली कोरोना संक्रमित मरीज ल लेहे ओखर घर पहुंचेन, तब हमला तको मन म थोकन डर रहत रहिस, फेर पूरा एहतियात के संग अपन जिम्मेदारी निभायेन। संक्रमित मन के आंकड़ा बाढ़े लगिस त चुनौती अऊ बाढ़ गे। गर्मी म पीपीई किट पहिनके ड्यूटी करे ले कभू-कभू चक्कर अउ डिहाइड्रेशन के समस्या होथे। फेर हम ये संकल्प लेन, के ये अप्रत्याशित कोरोना काल म ईश्वर ह हमला सेवा के जऊन अवसर देहे हे ओला जिम्मेदारी अउ समर्पण के संग पूरा करबोन। वो ह बताइस के प्रदेश के मुख्यमंत्री श्री भूपेश बघेल ह अपन विडियो संदेश म स्वास्थ्य, पुलिस अउ सफाई कर्मी मन विषम हालत म जऊन सेवाभाव अउ समर्पण देखावत हें, उंखर हौसल अफजाई करत उमन तारीफ घलोक करे रहिन। जेखर से श्री राजेश माने अऊ ऊंखर साथी मन म नवा उत्साह के संचार होए रहिस।
