एसईसीएल के कुसमुंडा कोयला खदान म भू-स्खलन, एक कामगार होइस लापता

कोरबा, 23 जुलाई 2020। एसईसीएल के कुसमुंडा कोयला खदान म आज बिहनिया भूस्खलन होगे। ये हादसा म आधा दर्जन श्रमिक बाल बाल बचिस। जबकि मउका म मौजूद सुरेश नामक एक ठेका कामगार लापता बताये जावत हे। मिले जानकारी के अनुसार ये हादसा आज बिहनिया 9 बजे के आसपास होइस। बिहनिया-बिहनिया तेज बारिश होवत रिहिस। कोयला खदान म ठेकादार केदार सिंह के मजदूर काम म जुटे रिहिस। इही बीच एकाएक भूस्खलन के घटना होगे। भूस्खलन के आभास मिलत ही मउका म मौजूद ठेका मजदूर अपन जान बचाये बर पीछू भागिस। आधा दर्जन मजदूर त मउका ले दूर निकले म सफल होगे लेकिन सुरेश नामक कामगार पिछड़गे। आशंका हे कि सुरेश भूस्खलन के बाद मिट्टी अउ कोयला के ढेर म दबे हो सकत हे। दुर्घटना के जानकारी मिले म कुसमुंडा पुलिस बल दरी के नगर पुलिस अधीक्षक केएल सिन्हा के संग मउका म पहुंचगे हे। कुसमुंडा एसईसीएल के वरिष्ठ अधिकारी घलो मउका म पहुंचगे हे अउ सुरेश के रेस्क्यू के कोशिश करे जावत हे। ये दुर्घटना के जानकारी पूरा क्षेत्र म देखते ही देखत जंगल के आगी के तरह फैलगे। पूरा क्षेत्र म सनसनी के वातावरण निर्मित होगे हे।