महासमुंद, 04 अगस्त 2020। महासमुंद पुलिस ह जिला म अब तक के सबले बड़का कार्रवाई ल अंजाम देवत हुए सब्जी परिवहन के नाम म गाड़ी ले करे जावत गांजा तस्करी के भंडाफोड़ करे हे. पुलिस ह दू आरोपी मन ले करीब 90 लाख ले जादा कीमत के 9 क्विंटल ले जादा गांजा जब्त करे हे.
महासमुंद पुलिस ल बुधवार के मुखबिर ले सूचना मिलिस कि ओडिशा के सीमावर्ती जिला सम्बलपुर, बरगढ़ के डाहर ले सिंघोडा-सरायपाली के रास्ता गांजा के परिवहन करे जावत हे . जेखर उपर थाना सिंघोडा के टीम तत्काल राष्ट्रीय राज्य मार्ग 53 के नाकेबंदी करके वाहन के इंतजार करे लागिस. इही बीच एक टाटा 407 क्रमांक JH 01 X 3855 ल ग्राम रेहटीखोल चेकिंग पाइंट पार करके गाड़ी म बइठे दू मनखे ले पूछताछ करे गिस. एमा गाड़ी म सवार श्याम सुन्दर ओरग निवासी ग्राम बिरंगाझर, जिला सुन्दरगढ, ओडिसा अउ उत्सव कुमार मिश्रा निवासी राउरकेला, जिला सुन्दरगढ, ओडिसा ह बताइस कि खीरा अउ भुट्टा ओ़डिसा ले मध्यप्रदेश ले जावत हन.
लेकिन झिल्ली मन म खीरा अउ बोरी म भुट्टा भरे होय म दुनो के बयान मन म विरोधाभाष ल देखत हुए पूरा तरह ले वाहन के चेकिंग करे गिस, जोन म खीरा अउ मक्का बोरी के नीचे छुपाके रखे गे 30 प्लास्टिक के बोरी मिलिस, जेखर अंदर सील करके गांजा के पैकट रखे गे रिहिस. गाड़ी के कुल 903 पैकेट म 9 क्विटंल 03 किलो ग्राम गांजा मिलिस, जोन ल आरोपी मन ह मध्यप्रदेश ले जाये के बात कबूल करिन. करीबन 90 लाख रुपिया के गांजा अउ 5 लाख रुपिया कीमत के गाड़ी प जब्त करके आरोपी मन के खिलाफ 20बी NDPS एक्ट के तहत थाना सिंघोडा म कार्रवाई करे जावत हे.
ये कार्रवाई पुलिस अधीक्षक प्रफुल्ल कुमार ठाकुर के मार्गदर्शन म एएसपी मेघा टेम्भुरकर साहू अउ एसडीओपी विकास पाटले के निर्देशन म थाना प्रभारी सिघोंडा उप निरीक्षक चन्द्रकांत साहू, आरक्षक सरोज बारिक, सुशांत बेहरा, रमाकांत त्रिपाठी, शोभा वर्मा, चितरंजन प्रधान, छत्तरदास पाटिल, गुलोचन वर्मा, नील सिह ठाकुर, सुधीर प्रधान ह करिन.
