रामचरण के आय म होइस बढ़ोतरी, साल म 70 हजार रूपिया के आमदनी
जांजगीर-चांपा, 04 अगस्त 2020। राष्ट्रीय कृषि विकास योजना के तहत पशुपालक मन ल कई योजना के तहत आर्थिक रूप ले समृद्ध करे जात हे। ये योजना मन के तहत दुध उत्पादन, बकरी पालन, मुर्गी पालन, मछली पालन करइया किसान मन ल प्रोत्साहित करे जात हे। जांजगीर-चांपा जिला के विकासखण्ड बम्हनीडीह के ग्राम करनौद निवासी श्री रामचरण पटेल बकरी पालन व्यवसाय ले हर बछर 70 हजार रूपिया के आमदनी पावत हे।
पशुधन विकास विभाग ले मिले जानकारी के मुताबिक पशुधन विकास विभाग ह राष्ट्रीय कृषि विकास योजना अंतर्गत श्री रामचरण पटेल ल जमुनापारी नर बकरा देहे रहिस। ओ बेरा म वोखर तिर कुल 20 देशी बकरी (छेरी) रहिस। जमुनापरी नस्ल के बकरा मिले ले नस्ल सुधार होइस। अब वोखर तिर उन्नत नस्ल के कुल 79 बकरी हे, जेमा ले प्रजनन वाले 3 नर बकरा, 40 मादा बकरी हे। जेमन 22 पिला देहे हें अऊ 38 पठरू घलव हे। ये व्यवसाय ले श्री रामचरण ल एक साल म करीबन 70 हजार रूपिया के आमदनी होए हे। पशुधन विकास विभाग कोति ले रामचरण के मार्गदर्शन, नियमित टीकाकरण अऊ कृमिनाशक दवापान कराए जात हे। श्री रामचरण ले प्रेरित होके ग्राम करनौद म 15 पशुपालक मन बकरी पालन के काम करत हें। पशुधन विकास विभाग के ये योजना ले पशुपालक मन ल प्रोत्साहन मिले हे। रामचरण ह ये योजना बर छत्तीसगढ़ सरकार ल धन्यवाद देहे हे।
