- मुख्यमंत्री ह छत्तीसगढ़ के पहिली महिला सांसद मिनीमाता ल उंखर पुण्य तिथि म अर्पित करिन विनम्र श्रद्धांजलि
- वीडियो कॉन्फ्रेंसिंग के माध्यम ले मिनीमाता स्मृति वातानुकूलित भवन के करिन लोकार्पण
रायपुर, 11 अगस्त 2020। मुख्यमंत्री श्री भूपेश बघेल ह आज कहिन के छत्तीसगढ़ के पहिली महिला सांसद मिनीमाता ह अपन पूरा जीवन मानव समाज के उत्थान अऊ महिला मन ल अधिकार देवाए बर समर्पित कर दीन। मिनीमाता सामाजिक सुधार मन बर तको जाने जात रहिन। छत्तीसगढ़ सरकार मिनीमाता के आदर्श मन ऊपर चलके महिला उत्थान के काम करत हे। ऊंखर आदर्श मन म चलके ही हमला समृद्ध छत्तीसगढ़ बनाना हे। मुख्यमंत्री ह आज इहां अपन निवास म मिनीमाता के पुण्य तिथि म ऊंखर फोटू म माल्यार्पण करके ओ मन ल विनम्र श्रद्धांजलि अर्पित करत ए आशय के विचार प्रकट करिन। ए अवसर म श्री बघेल ह अपन रायपुर निवास ले वीडियो कॉन्फ्रेंसिंग के माध्यम ले न्यू राजेन्द्र नगर स्थित सांस्कृतिक भवन परिसर म लगभग 44 लाख रूपिया के लागत ले नवनर्मित मिनीमाता स्मृति वातानुकूलित भवन के लोकार्पण करिन। कार्यक्रम के अध्यक्षता नगरीय प्रशासन अऊ श्रम मंत्री डॉ. शिवकुमार डहरिया ह करिन। कार्यक्रम के आयोजन गुरू घासीदास साहित्य अऊ संस्कृति अकादमी अऊ समस्त सतनामी समाज कोति ले करे गीस।
मुख्यमंत्री श्री भूपेश बघेल ह ए अवसर म कहिन के ममतामयी मॉ मिनीमाता ल आज ऊंखर स्मृति दिवस म पूरा छत्तीसगढ़ श्रद्धा के संग याद करत हे। मिनीमाता ह स्वतंत्रता संग्राम म घलोक योगदान देहे रहिन। उमन सामाजिक कुरीति, छूआ-छूत, बाल विवाह, गरीबी, दहेज प्रथा उन्मूलन के क्षेत्र म उल्लेखनीय काम करे रहिन। मनखे मन के तकलीफ ल दूर करे अऊ उमन ल न्याय देवाए बर ओ मन खुद पहल करत रहिन। उमन दबे, कुचले, शोषित समाज के अवाज बुलंद करिन। संसद म अस्पृश्यता निवारण अधिनियम ल पारित कराए म उमन महती भूमिका निभाईन। श्री बघेल ह कहिन के मिनीमाता ल दलित अऊ महिला मन के उत्थान बर करे काम मन बर सदा याद करे जाही।
मिनीमाता के योगदान ल हमेसा बर स्थाई बनाए राखे बर छत्तीसगढ़ के हसदेव बांगो बांध के नामकरण मिनीमाता के नाम म करे गए हे। छत्तीसगढ़ सरकार ह गांव मन म घर-घर शुद्ध पेयजल उपलब्ध कराए बर मिनीमाता अमृत धारा योजना के शुरुआत करे हे। मुख्यमंत्री ह ए अवसर म समाज के प्रतिनिधि मन कोति ले प्रस्तुत करे गए कई ठन मांग मन ऊपर सहानुभूति पूर्वक विचार करके जल्दी कार्यवाही करे के आश्वासन दीन।
मुख्यमंत्री निवास म उपस्थित नगरीय प्रशासन मंत्री डॉ.शिवकुमार डहरिया ह ए अवसर म कहिन के मुख्यमंत्री श्री भूपेश बघेल के नेतृत्व म छत्तीसगढ़ सरकार अनुसूचित जाति, अनुसूचित जनजाति, पिछड़ा वर्ग अऊ गरीब मन के विकास बर हर संभव प्रयास करत हे। राज्य सरकार छत्तीसगढ़ के अस्मिता के चिन्हारी मिनीमाता संग प्रदेश के महापुरूष मन के सपना पूरा करे के दिशा म काम करत हे। कार्यक्रम स्थल ले कार्यक्रम के विशिष्ट अतिथि नगर निगम रायपुर के महापौर श्री एजाज ढेबर ह घलोक सम्बोधित करिस। गुरु घासीदास साहित्य अउ संस्कृति अकादमी अउ सतनामी समाज के प्रदेशाध्यक्ष श्री के.पी.खण्डे ह समाज के कई ठन मांग रखीन। डॉ. डहरिया ह मुख्यमंत्री ल चिनहा घलोक भेंट करिन।
कार्यक्रम स्थल म कार्यक्रम के संयोजक श्रीमती शकुन डहरिया, गुरु घासीदास साहित्य अऊ संस्कृति अकादमी अऊ सतनामी समाज के महासचिव श्री जे.आर.सोनी, कोषाध्यक्ष श्री डी. एस. पात्रे, सचिव श्री जी. आर.बाघमारे, प्रवक्ता चेतन चंदेल, समाज के जिला अध्यक्ष श्री सुंदर जोगी, सतनामी समाज के विशिष्टजन अऊ प्रतिभावान छात्र-छात्रा अऊ ऊंखर पालक ए अवसर म उपस्थित रहिन। नगरीय प्रशासन मंत्री डॉ. शिवकुमार डहरिया ह ए कार्यक्रम के बाद न्यू राजेन्द्र नगर कार्यक्रम स्थल पहुंचके उहां सामाजिक क्षेत्र म उत्कृष्ट काम बर महिला मन अऊ प्रतिभावान छात्र-छात्रा मन ल सम्मानित घलोक किरिन।
