कोरिया म दिखिस दुलर्भ सफेद भालू, वन विभाग के टीम अलर्ट

कोरिया, 12 अगस्त 2020। कोरिया जिला के नगर निगम चिरमिरी के डोमनहिल इलाका म एक मनखे के बारी म दुर्लभ सफेद भालू देखे गे हे। ये मनखे ह मोबाइल म ओखर फोटो खिचीस अउ वीडियो घलो बनाइस। शहर म पहली घाव सफेद भालू देखे जाये ल लेके लोगन मन म कौतूहल के विषय बने हे। उहें वन विभाग ह लोगन मन ले अपील करे हे कि दुर्लभ सफेद भालू ल कोनो नुकसान झन पहुंचाएं। सूचना मिले के बाद वन विभाग ये भालू उपर नजर रखे जाये के बात कहत हे। डोमनहिल म रहइया इलियास अहमद सिद्दीकी नामक मनखे के बारी म कटहल के पेड़ लगे हे। इहां सफेद भालू बारी म लगे कटहल खाये ल आये रिहिस। सफेद भालू पेड़ उपर चढ़त रिहिस तभे अचानक काखरो आवाज आये के बाद वो पेड़ ले गिरगे अउ जंगल कोती लहुटगे। मामला के जानकारी मिले के बाद वन विभाग के टीम अलर्ट होगे हे। वन विभाग जनता ल जागरुक करे म जुटा हे, उहें विभाग के टीम सफेद भालू के आवाजाही अउ ओखर हरकत मन उपर निगरानी म जुटा हे। बताये जावत हे कि सफेद भालू पिछला दू हप्ता ले कटहल के पेड़ के पास आके घूमत रहिथे।