रायपुर, 17 अगस्त 2020। स्वतंत्रता दिवस के दिन 15 अगस्त के राज्य के सबो जिला मुख्यालय मन म छत्तीसगढ़ी खानपान अऊ व्यंजन विक्रय केंन्द्र ‘गढ़ कलेवा’ के शुभारंभ होइस। ये केन्द्र के खुले ले नागरिक मन ल सस्ता दर म छत्तीसगढ़ी पकवान मिलही। एखर अलावा बड़े पैमाना म महिला मन ल रोजगार मिलही। मुख्यमंत्री श्री भूपेश बघेल ह राज्य के सबो जिला मुख्यालय के मुख्य बाजार, गौरवपथ, राज्यमार्ग राष्ट्रीय राजमार्ग के तीर गढ़ कलेवा शुरू करे के निर्णय ले रहिन। मुख्यमंत्री ह मुख्यसचिव ल ये संबंध म जरूरी कार्यवाही करे ल कहे रहिन।
राज्य शासन के हुकुम के मुताबिक बस्तर जिला मुख्यालय के शहीद पार्क म गढ़कलेवा के शुरूआत 15 अगस्त के स्कूल शिक्षा मंत्री डॉ. प्रेमसाय सिंह टेकाम अऊ आन गणमान्य जनप्रतिनिधि मन ह करिन। ये गढ़कलेवा म छत्तीसगढ़ी व्यंजन मन के संग बस्तर के स्थानीय व्यंजन मन के बिक्री करे जात हे। ये गढ़कलेवा ल 15 सदस्य मन के महामाया स्व-सहायता समूह कोति ले संचालित करे जात हे। जऊन भिनसरहा 10 बजे ले संझा 5 बजे तक खुले रहिही। गढ़कलेवा ले जिला के नागरिक मन ल नाश्ता के रूप म छत्तीसगढ़ी अउ बस्तरिया व्यजंन के स्वाद लेहे के अवसर मिलही। महामाया स्व सहायता समूह के महिला कोति ले फरा, मूंग-उड़द बडा, गुलगुला, अरसा, तिखुर, पताल चटनी संग आन व्यजन मन के बिक्री करे जात हे। नगर पालिक निगम कोति ले ये गढ़कलेवा ल सोमवार 17 अगस्त के जनता बर खोले गीस। ये बेरा म महापौर श्रीमती सफीरा साहू, अध्यक्ष श्रीमती कविता साहू, नगर निगम आयुक्त श्री प्रेमकुमार पटेल गढ़कलेवा पहुंचके व्यजंन के स्वाद लीन।
