गरियाबंद, 16 सितम्बर 2020। राज्य शासन के निर्देश के मुताबिक फसल मन के गिरदावरी के काम राज्य के सबो जिला मन म करे जात हे। गिरदावरी के काम मन के निरीक्षण उच्च अधिकारी मन करत हें। इही कड़ी म गरियाबंद जिला म अभी राजस्व अऊ कृषि विभाग के मैदानी अमला मन खरीफ धान फसल के गिरदावरी रिपोट तियार करे के काम युद्ध स्तर म जारी हे।
शासन के निर्देश के मुताकिक ये काम 20 सितम्बर तक पूरा करना हे। कलेक्टर श्री छतर सिंह डेहरे आज राजस्व अमला के काम मन के उदुपहा जांच करे फिंगेश्वर विकासखण्ड के गांव मन म पहुंचिन। उमन फिंगेश्वर के कृषक दीपक तिवारी खसरा नम्बर 1069 म फसल गिरदावरी काम के मौका-मुआयना करिन। ये बेरा म उमन कृषक श्री दीपक तिवारी ले रू-ब-रू चर्चा करके ऊंखर कुल रकबा म बोये गये धान फसल के जानकारी लीन। संगेच राजस्व अमला ल 20 सितम्बर तक गिरदावरी काम शत् प्रतिशत पूरा करे के निर्देश दीन। कलेक्टर ह राजिम म घलोक गिरदावरी काम के निरीक्षण करिन। उमन मौका म उपस्थित एसडीएम अऊ तहसीलदार ल जरूरी दिशा निर्देश दीन। ये बेरा म एसडीएम राजिम श्री जी.डी. वाहिले, तहसीलदार श्री ओ.पी. वर्मा, जनपद पंचायत के सीईओ श्री हरिराम सिदार, नायब तहसीलदार श्री प्रेमुलाल साहू, पटवारी श्री कौशल चन्द्राकर अऊ कृषि विभाग के अधिकारी उपस्थित रहिन।
