रायपुर, 16 सितम्बर 2020। स्वास्थ्य मंत्री श्री टी.एस. सिंहदेव के पहल म अम्बिकापुर के नवापारा स्थित शहरी प्राथमिक स्वास्थ्य केंद्र म कैंसर जइसे घातक बीमारी के ईलाज बर कीमोथेरेपी के सुविधा उपलब्ध हो गए हे। स्वास्थ्य मंत्री ह ऑनलाइन दू बिस्तर के दीर्घायु वार्ड म कीमोथेरेपी के शुभारंभ करिन। कार्यक्रम ल संबोधित करत मंत्री श्री सिंहदेव ह कहिन के स्थानीय स्तर म कैंसर के इलाज बर नवापारा प्राथमिक स्वास्थ्य केंद्र म कीमोथेरेपी के व्यवस्था करे गए हे। कीमोथेरेपी सुरू होए ले मरीज मन ल अब बड़े शहर कोति मुह नइ ताकना परही। कैंसर के ईलाज बर कीमोथेरेपी के संगेच रेडियोथेरेपी के घलोक बहुत जरूरत होथे। ये केंद्र म रेडियोथेरेपी के सुविधा घलोक जल्द शुरू करे जाही। उमन कहिन के मरीज मन के बेहतर ईलाज, सेवा भावना के संग करे जाए। कोरोना महामारी के संकट काल म कोरोना योद्धा मन के सेवा समाज बर महत्वपूर्ण हे।
स्वास्थ्य विभाग के अधिकारी मन ह बताइन के कैंसर के ईलाज सर्जरी, कीमोथेरेपी अऊ रेडियोथेरेपी ले करे जाथे। ये केंद्र म अभी हाल म 2 बेड के वार्ड ले कीमोथेरेपी के शुरुआत करे गए हे। भविष्य म एला 30 बेड के वार्ड के रूप म बढ़ाए जाही। ये मौका म दू मरीज मन के कीमोथेरेपी घलोक करे गीस। ऑनलाइन कार्यक्रम म छत्तीसगढ़ राज्य वनाओषधि पादप बोर्ड के अध्यक्ष श्री बालकृष्ण पाठक, महापौर डॉ. अजय तिर्की, जिला पंचायत के उपाध्यक्ष श्री राकेश गुप्ता, पर्षद श्री द्वितेंद्र मिश्र श्रीमती गीता रजक, मेडिकल कालेज के डीन डॉ. आर.के. सिंह, से.एम.एच.ओ. डॉ. पी.एस. सिसोदिया, शहरी प्राथमिक स्वास्थ्य केंद्र नावापारा के प्रभारी डॉ. आयुष जायसवाल, डॉ. आमिन फिरदौशी उपस्थित रहिन।
