बदमाश मन ह करिन आरक्षक ले झूमा झटकी, फाड़ीस वर्दी 

रायपुर, 20 सितंबर 2020। प्रदेश म अपराधी मन के हौसला बुलंद हो गेहे। मामला 112 के दु आरक्षक के पिटई के हरे। बतादन कि पिछु रात आरोपी जागेश्वर के गुढ़ियारी म नारायण मिश्रा नाम के मनखे ले विवाद होय के बाद थाना म सुलह कर दुनों घर चले गिस। फेर रविवार के जागेश्वर साहू नारायण मिश्रा के लड़का ल चाकू, पंच अउ डंडा मार के उकर घर म घुस गे। जेकर सूचना डायल 112 के टीम ल देहे गिस। पुलिस के टीम जब आरोपी ल पकड़ के थाना लात रिहिस , ये दौरान बदमाश मन अउ आरक्षक के बीच झूमा झटकी होगे। एकर बाद आरक्षक खूबलाल साहू अउ गौरीशंकर साहू के हाथ अउ अंगूठा ल जागेश्वर साहू अउ उकर संगवरी हरीश साहू ह दांत ले काट दिस। अतने ही नहीं वर्दी घलो फाड़ दिस। पुलिस ह दुनों आरोपी के खिलाफ थाना गुढ़ियारी म धारा 164, 452, 323, 294, 506, 254, 186, 332, 353 अउ 34 के तहत अपराध दर्ज करके गिरफ्तार कर लिस हे।