रायपुर,20 सितंबर 202प। प्रदेश के पहिली महिला सांसद ममतामयी मिनीमाता के जनम भुइंया असम अब उंकर सुरता ल उम्मर राखे खातिर स्मारक बनाये के शिलान्यास होगे। असमवासी छत्तीसगढि़या मन संग सरलग भेट मुलाकात करइया वरिष्ठ संस्कृति कर्मी श्री अशोक तिवारी कोति ले आरो मिले हाबे के आज असम के नागांव जिला म कलियाबोर नाव के शहर तिर के सिकोनी पथार गांव म मिनीमाता जी के स्मारक बनाये खातिर भूमिपूजन होइस।
जानबा होवय के मिनीमाता जी के जनम असम के उही ठउर म होए रिहिसे। स्मारक बनाये खातिर रायपुर के राज्यसभा सांसद श्रीमति छाया वर्मा ह 20 लाख रुपिया सांसद निधि ले दिये हाबे। अउ क्षेत्रीय विधायक श्री महंत जी ह तको ये बुता खातिर लाख रुपिया के सहयोग राशि देके घोसना करे हावय। आज भूमिपूजन के मउका म असम म निवासरत सतनामी समाज के गजब झिन छत्तीसगढि़या मन जुरियाए रिहिन।
स्मारक के बने ले छत्तीसगढ़ म ममतायमी गुरू माता के रूप म सम्मानित मिनीमाता जी के जन्म स्थान म ओकर पावन सुरता ल अम्मर राखे जा सकही, जनम भुइंया म भव्य स्मारक खातिर उहां अउ छत्तीसगढ़ के लोगन मनके तको गजब दिन ले आस रिहिसे। अब अगोरा के दिन लक्ठा गे छत्तीसगढ़ सरकार तको अइसन पुनीत कार्य म अपन भूमिका के निर्वाह करही अऊ स्मारक ल भव्यता प्रदान करे के उदीम जरूर करही।
अँजोर ले साभार
