गुंडरदेही, 23 सितंबर 2020। बालोद जिला कंटेनमेंट जोन घोषित होय के बाद अधिकारी मन द्वारा लॉकडाउन के सख्ती ले पालन करवाय बर पैदल मार्च करे गिस। गुंडरदेही एसडीएम भूपेंद्र अग्रवाल के नेतृत्व म तहसीलदार अश्वन कुमार पुशाम अउ थाना प्रभारी गुंडरदेही रोहित मालेकर ह ग्रामीण क्षेत्र म पैदल मार्च करके व्यापारी मन ल दुकान बंद कराय के अपील करिस हे।
गौरतलब हे कि जिला प्रशासन द्वारा जारी करे अपन आदेश म 23 सितंबर बुधवार के संझा 6 बजे के बाद ले लॉक डाउन करे जाय के आदेश जारी करे गे रिहिस। उक्त आदेश ल मौखिक तौर म बदलत हुए अधिकारी द्वारा दुकान बंद कराय जाय बर नगरीय अउ ग्रामीण क्षेत्र म पैदल मार्च कर आदेश देहे गे हे।
एखर ले व्यापारी मन म अफरा-तफरी के माहौल देखे ल मिलत हे। काबर की जिला प्रशासन के डाहर ले 23 सितंबर के संझा 6 बजे तक दुकान खोले रखे के आदेश देहे गे रिहिस। उहें दुकानदार मन द्वारा संझा तक दुकान खुले के हिसाब ले होटल अउ दूसरा दुकान वाले ह अपन-अपन प्रतिष्ठान उहीं तैयारी के हिसाब ले खोल के रखे रिहिस। स्थानीय प्रशासन द्वारा तत्काल प्रभाव ले दुकान बंद करे जाय के आदेश देवत हुए ग्रामीण क्षेत्र म घलो पैदल मार्च करत हुए दुकान बंद कराय गे हे। एखर सेती कई व्यापारी मन खासकर होटल व्यवसाय ले जुड़े हुए लोगन ह स्थानीय प्रशासन के उक्त रवैइया ल लेके नाराजगी देखे गिस।
