मुख्यमंत्री शहरी स्लम स्वास्थ्य योजना के पहिली चरण म होही 60 मोबाइल मेडिकल यूनिट के संचालन
रायपुर, 26 सितंबर 2020। मुख्यमंत्री श्री भूपेश बघेल के मंशा के मुताबिक छत्तीसगढ़ राज्य के 14 नगर निगम मन के स्लम इलाका मन म मनखे मन ल घर पहुंच स्वास्थ्य सुविधा उपलब्ध कराए जाही। नगरीय प्रशासन अऊ विकास विभाग के माध्यम ले शुरू होवईया स्वास्थ्य सेवा बर 55 करोड़ रूपिया उपलब्ध कराए के अनुसंशा ये योजना के क्रियान्वयन बर गठित समिति ह करे हे। एकर उद्देश्य शहरी स्लम इलाका के मनखे मन ल सरलग मोबाइल मेडिकल यूनिट के माध्यम ले बेहतर चिकित्सा सुविधा अऊ निःशुल्क दवई उपलब्ध कराना हे।
मुख्यमंत्री शहरी स्लम स्वास्थ्य योजना के क्रियान्वयन के संबंध मे मुख्य सचिव श्री आर.पी. मंडल के अध्यक्षता म गठित समिति के आज वीडियो कॉन्फ्रेंसिंग के माध्यम ले बैठक आयोजित होइस। बैठक म ये योजना के क्रियान्वयन बर 55 करोड़ रूपिया देहे के अनुशंसा करे गीस। मुख्य सचिव ह ये योजना ल जल्दी शुरू करे के निर्देश नगरीय प्रशासन विभाग ल दीन। प्रारंभिक चरण म ये योजना प्रदेश के सबो 14 नगर पालिक निगम मन के स्लम क्षेत्र मन म 60 मोबाइल मेडिकल यूनिट के माध्यम ले शुरू करे जाही, जेखर जरिए नगरीय क्षेत्र मन के कई ठन मोहल्ला अऊ पारा मन म, विशेषकर स्लम इलाका मन म मनखे मन के स्वास्थ्य के जांच अऊ उपचार के संगेच निःशुल्क दवई बांटे जाही।
आप मन जानतेच हव के मुख्यमंत्री शहरी स्लम स्वास्थ्य योजना ल लागू करे के संबंध म बीते 5 मई के मुख्यमंत्री श्री भूपेश बघेल के अध्यक्षता म आयोजित बैठक म एखर कार्ययोजना के समीक्षा करे गए रहिस। मुख्यमंत्री श्री बघेल ह ये योजना ल नगरीय क्षेत्र मन म लउहे शुरू करे के संगेच एखर बर जरूरी राशि उपलब्ध कराए के निर्देश देहे रहिन।
