लइका मन ल पढ़ाए के संग लीन पढ़ई तुंहर दुआर योजना के क्रियान्वयन के जायजा
रायपुर, 26 सितंबर 2020। शिक्षा विभाग के प्रमुख सचिव डॉ आलोक शुक्ला आज बस्तर जिला के मुख्यालय अउ ग्रामीण क्षेत्र मन म पहुंचके कोरोना काल म लइका मन ल उपलब्ध कराए जात शिक्षा व्यवस्था के जायजा लीन।
डॉ. शुक्ला ह कंगोली पटेलपारा म, पोटानार अऊ सिंघनपुर म संचालित मोहल्ला कक्षा मन के जायजा लीन अऊ आम, बरगद अऊ पीपर के छांव म पढ़े बर सकलाए लइका मन ल खुद घलोक पढ़ाइन। ओ मन केबल टीवी के माध्यम ले लेहे जात वर्चुअल क्लास बर वृंदावन कालोनी म बनाय गए स्टूडियो म घलोक पहुंचिन अऊ लइका मन तक शिक्षा देहे बर वालिंटियर्स कोति ले करे जात प्रयास मन के सराहना करिन। उमन मोहल्ला कक्षा मन म लइका मन ल देहे जात शिक्षा ल बेहतर बनाए के सुझाव घलोक दीन। उमन सिंघनपुर म स्मार्ट टीवी के माध्यम लेहे जात कक्षा के जायजा घलोक लीन। उमन ये दौरान बताइन के पढ़ई तुंहर दुआर कार्यक्रम बर करीबन 20 हजार वीडियो तियार करे गए हे अऊ ए वीडियो ल डाउनलोड करके लइका मन ल देखाय जा सकत हे। ये सब्बो वीडियो लइका मन के पढ़ाई म सहायता करही।
ये दौरान जिला कलेक्टर श्री रजत बंसल, जिला पंचायत के मुख्य कार्यपालन अधिकारी श्री इंद्रजीत चंद्रवाल, सहायक कलेक्टर सुश्री रेना जमील, शिक्षा विभाग के संयुक्त संचालक श्री ए एल राठिया, जिला शिक्षा अधिकारी श्री राजेन्द्र झा, राष्ट्रीय माध्यमिक शिक्षा मिशन के जिला समन्वयक सुश्री भारती प्रधान जिला मिशन समन्वयक श्री अशोक पाण्डे, सहायक परियोजना समन्वयक श्री गणेश तिवारी संग आन अधिकारी उपस्थित रहिन।
