कोरबा, 1 अक्टूबर 2020। एक अक्टूबर बिहनिया के पहली किरण कोरबा जिला म लॉकडाउन खुले के संग ही कोरबा के रजगामार निवासी 24 वर्षीय कोरोना संक्रमित गर्भवती महिला के जिनगी म नवा खुशी लेके आईस। जिला के डेडिकेटेड कोविड अस्पताल म महिला ह स्वस्थ बालक ल जन्म दिस हे। कोरोना महामारी के दौर म जिला के ईएसआईसी कोविड अस्पताल म मेडिकल टीम ह बड़का उपलब्धि हासिल करे हे। कोविड अस्पताल के डाक्टर मन ह कोरोना संक्रमित महिला के सुरक्षित प्रसव कराये हे। प्रसव के बाद जच्चा-बच्चा दुनो स्वस्थ्य हे। कोरोना संक्रमित महिला ह प्रसव के दौरान लड़का ल जन्म दिस जोन ह पूर्ण रूप ले स्वस्थ्य हे। मेडिकल टीम द्वारा नवजात शिशु के देखभाल करे जावत हे अउ महिला के कोरोना ईलाज जारी हे।
ईएसआईसी कोविड अस्पताल कोरबा म कोनो कोरोना संक्रमित महिला के प्रसव के पहली मामला हे। कलेक्टर श्रीमती किरण कौशल ह शिशुवती माता ल बधाई दीन अउ कोविड अस्पताल के जम्मो मेडिकल स्टाफ के तारीफ करके होैसला बढ़ाये हे। कलेक्टर ह कहिन कि गर्भवती महिला के कोविड-19 संक्रमित होय के सेती सुरक्षित प्रसव कराना चुनौतीपूर्ण कार्य रिहिस जोन ल डाक्टर मन के टीम ह अच्छा ढंग ले पूर्ण करिन। कलेक्टर ह कहिन कि जिला म बनाए गे कोविड अस्पताल म ईलाज करइया मरीज सरलग ठीक होवत हे। कोविड अस्पताल म कुशल डाक्टर अउ नर्स मन के मेडिकल टीम के ड्यूटी लगाये गे हे।
