सुकमा, 05 अक्टूबर 2020। देश-विदेश के मनखे अब छत्तीसगढ़ के आदिवासी बहुल सुकमा जिला के जनजातीय उद्यमी मन के अमली ले तियार ‘इमली चस्का टेस्ट ऑफ सुकमा‘ के नाम ले तियार उत्पाद के ऑनलाईन खरीदी करके एकर सुवाद ले सकहीं। जनजातीय उद्यम के उत्पाद अऊ हस्तशिल्प के उत्पाद ल बाजार उपलब्ध कराए बर ट्राईफेड ह ’ट्राइब्ल इंडिया ई-मार्केट प्लेस’ ऑनलाइन प्लेटफार्म लांच करे हे। ये ऑनलाइन प्लेटफार्म म छत्तीसगढ़ के सुकमा जिला के जनजाति उद्यमि मन के उत्पादित अमली चस्का ‘टेस्ट ऑफ सुकमा‘ ल सामिल करे गए हे।
ट्राईफेड आदिवासी उद्यमी मन के उत्पाद मन ल बेहतर बाजार उपलब्ध कराए अऊ गुणवत्तापूर्ण उत्पाद ल सीधा बाजार तक पहुंचाए म मदद करथे। एकरे तहत गांधी जयंती के अवसर म 2 अकटूबर के ट्राईफेड ई मार्केट के ऑनलाइन शुभारंभ होए हे। ’ट्राइब्ल इंडिया ई-मार्केट प्लेस’ के अन्तर्गत छत्तीसगढ़ ले सुकमा जिला के अमली चस्का उत्पाद ल ट्राइब्ल इंडिया प्रोडक्ट लाइन-अप म सामिल करे गए हे। एखर अलावा मार्केट प्लेस ट्राइब्ल इंडिया म छत्तीसगढ़ के जनजाति मन के बनाए आकर्षक हस्तशिल्प अऊ सजावटी सामान मन ल घलोक सामिल करे जाही। ये मां सुकमा के अमली ले बने इमली चस्का के अलावा हल्दी पावडर जइसन मसाला घलोक सामिल करे जाही।
छत्तीसगढ़ म ये इमली चस्का ’टेस्ट ऑफ सुकमा’ उत्पाद के निर्माण अरण्य प्रस्संकरण सहकारी समिति मर्यादित सुकमा ह करत हे। ये समिति म जिला के 21 महिला सदस्य सामिल हे। राष्ट्रीय ग्रामीण आजीविका मिशन के महिला स्व-सहायता समूह मन आपस म मिलके अरण्य प्रसंकरण सहकारी समिति के गठन करे हें। समिति के प्रबंधक के बताती शासन कोति ले निरधारित समर्थन मूल्य (एमएसपी) म इमली खरीदे जाथे। एकर पाछू मांग के अनुसार 100 ग्राम, 200 ग्राम, 500 ग्राम अऊ पाउच म इमली चस्का निर्माण करे जात हे। एखर अलावा ट्राइफेड ह दू हजार पैक इमली चस्का के आर्डर देहे हे। ये इमली चस्का टेस्ट ऑफ सुकमा प्रोडक्ट शबरी मार्ट सुकमा म उपलब्ध हे।
