रेती चोरी म लगे दू ट्रैक्टर ल जिला टाॅस्क फोर्स ह पकड़िस

कोरबा, 8 अक्टूबर 2020। कलेक्टर किरण कौशल के निर्देश म रेती चोर मन उपर लगाम कसे बर जिला टाॅस्क फोर्स कार्रवाई करत हे। बुधवार के टाॅस्क फोर्स ह फेर अवैध रेती खनन अउ रेती चोरी म लगे दू ट्रैक्टर ढेंगुरनाला ले जब्त करिन। ए ट्रैक्टर सीएसईबी के पुराना राखड़ डेम के नीचे ढेंगुरनाला ले रेती चोरी म लगे रिहिस। दुनों ट्रैक्टर मन ल डिप्टी कलेक्टर आशीष देवांगन अउ नायब तहसीलदार पंचराम सलामे ह नाला म खुद उतर के पकड़िस। अवैध रेती चोरी म लगे एक ट्रैक्टर म रेती ओवरलोड के सेती वो नाला म ही फंसगे रिहिस अउ ओखर पलटे के घलो आशंका बने रिहिस। बड़ मुश्किल ले ट्रैक्टर ल रेती सहित नाला ले निकाल के खनिज विभाग के अधिकारी मन के सुपुर्द करे गिस। दूसरा ट्रैक्टर रेती भरे बर अवैध उत्खनन स्थल म खाली खड़े रिहिस। जोन ल घलो जब्त कर लेहे गए हे। दुनों ट्रैक्टर ल उचित कार्रवाई बर खनिज विभाग के अधिकारी मन के सुपुर्द करे गिस हे।