मुख्यमंत्री ह करिन गृह विभाग के समीक्षा
महिला मन उपर घटित अपराध मन म साल 2019 के तुलना म साल 2020 म आईस कमी
वरिष्ठ नागरिक मन के सहायता बर छत्तीसगढ़ पुलिस शुरू करही ‘समर्पण अभियान‘
डायल 112 के संग करीबन 14 लाख जरूरतमंद नागरिक मन तक पहुंचाए गीस पुलिस अऊ चिकित्सा सहायता
रायपुर, 14 अक्टूबर 2020। मुख्यमंत्री श्री भूपेश बघेल ह कहे हें के महिला मन के विरूद्ध घटित अपराध के मामला म लापरवाही बरतइया पुलिस अधिकारी अऊ कर्मचारी मन ल बर्दाश्त नइ करे जाए। मुख्यमंत्री ह आज इहां अपन निवास कार्यालय म गृह विभाग के समीक्षा बैठक म निर्देश दीन के अइसे अधिकारी-कर्मचारी उपर सख्त ले सख्त कार्यवाही करे जाय। बैठक म गृह मंत्री श्री ताम्रध्वज साहू घलोक उपस्थित रहिन।
मुख्यमंत्री ह पुलिस महानिदेशक ल निर्देश दीन कि महिला अपराध के रोकथाम बर राज्य स्तर म सतत मॉनिटरिंग अऊ समीक्षा करे जाय। एखर बर एसओपी बनाए जाय अऊ पुलिस मुख्यालय सीधा महिला मन के विरूद्ध गंभीर अपराध के समीक्षा करय। उमन कहिन के सबो जिला मन म ए अपराध मन के रोकथाम बर विशेष जांच दल के गठन घलोक करे जाए। पुलिस महानिदेशक श्री डी.एम अवस्थी ह बैठक म बताइस के सबो जिला के पुलिस अधीक्षक मन ल वीडियो कॉन्फ्रेंसिंग के माध्यम ले महिला मन के विरूद्ध अपराध उपर अंकुश रखे अऊ अइसन मामला मन के तत्परता ले जांच करे के निर्देश देहे गे हे। उमन बताइस के राज्य म महिला मन उपर घटित कुल अपराध मन म साल 2019 के तुलना म साल 2020 म कमी आए हे।
