कोरबा, 22 अक्टूबर 2020। सोना चांदी के जेवरात के चोरी करने वाला मन ल पुलिस ह 5 घंटा म धरदबोचिस हे। चोरी करने वाला तीन आरोपी मन ल गिरफ्तार करिन हे। मामला दर्री थाना क्षेत्र अंतर्गत अयोध्यापुरी के हे। दर्री थाना प्रभारी ह बतइस कि रविंद्र नाथ सिंह निवासी अयोध्यापुरी ह शिकायत दर्ज कराए रिहिस कि अज्ञात चोर ह अलमारी म रखे चांदी के पायल ,चांदी के मूर्ति, बिछिया, सोना के हार, सोना के झुमका, मंगलसूत्र कुल कीमत 2 लाख के सामान चोरी कर लेहे हे।
प्रार्थी के रिपोर्ट म दर्री पुलिस ह धारा 457, 380 भादवि कायम करके विवेचना म लिन। विवेचना म पुलिस ह अभय गोस्वामी उर्फ ताता उम्र 23 वर्ष , अमित मरकाम उम्र 23 वर्ष निवासी अयोध्यापुरी अऊ एक नाबालिग बालक ल तलब करके पूछताछ करिन। ए दौरान आरोपी मन ह मंगलवार के मध्य रात्रि प्रार्थी के घर घुस के चोरी करना स्वीकार करिन। आरोपी मन के कब्जा ले सोना अऊ चांदी के जेवरात कीमती 2 लाख रुपिया जब्त करिन। आरोपी मन ल गिरफ्तार करके न्यायिक रिमांड म भेजे गे हे।
