रायपुर, 22 अक्टूबर 2020। दीपावली के तिहार गोबर ले बने ‘‘बालोद दीपक‘‘ ले घलोक रोशन होही। बालोद जिला के ग्राम गुजरा के संगम स्वसहायता समूह के महिला मन गोबर ले रंगबिरंगा आकर्षक दीया बनावत हेंं। एकर नाम ‘‘बालोद दीपक‘‘ रखे गए हे। गोबर ले बने बालोद दीपक के विक्रय राजधानी रायपुर संग राज्य के आन जिला मन म घलोक करे जात हे। छत्तीसगढ़ म गोबर ले बने रंग-बिरंगा आकर्षक दीया, नारियल, कलश, स्वास्तिक, कछुआ दीया, गुल्लक आदि चीज मन के मांग सरलग बाढ़त हे। गोबर ले बने ए चीज मन के धार्मिक महत्व होए के संगेच एखर से पर्यावरण के सुरक्षा घलोक होही।
संगम स्वसहायता समूह के सदस्य मन ह बताइन केे ओ मन करीबन एक महिना पहिली ले गोबर के दीया बनाना शुरू करे हेंं। अब तक पॉच हजार ले जादा दीया बन गे हे अऊ विक्रय घलोक शुरू कर देहे हेंं। महिला मन ह बताइन के ओ मन गोबर के दीया के अलावा गोबर ले स्वास्तिक, शुभ-लाभ अउ मोमबत्ती दीया घलोक बनावत हेंं। समूह के सदस्य मन ह बताइन के एक दिन म करीबन एक हजार दीया बना लेथें। समूह कोति ले गोबर ले सजावट के समान घलोक बनाए जात हे।
राष्ट्रीय ग्रामीण आजीविका मिशन (बिहान) के सहायक परियोजना अधिकारी ह बताइस के गोबर ले दीया अऊ आन चीज बनाए बर बालोद जिला के पॉचो विकासखण्ड म आजीविका गतिविधि संचालित करे जात हे, जेमां पचास महिला मन सामिल हे। जेमन दीया, नारियल कलश, कछुआ दीया, गुल्लक आदि आकर्षक आकृति घलोक बनात हेंं। उमन बताइन केे जिला म अब तक पचास हजार दीया, पन्द्रह सौ ओम, पन्द्रह सौ श्री अऊ दूू हजार शुभ-लाभ तियार कर डरे हेंं।
