दुर्ग, 23 अक्टूबर 2020। दुर्ग जिला के रसमड़ा औद्योगिक क्षेत्र म खुलेआम ठेला मन म अऊ स्थाई दुकान बनाके शराब पिलाए के धंधा फलत-फूलत हे हर रोज उहां करीबन 5 ले 6 पेटी देसी अऊ अंगरेजी शराब के बिक्री खुलेआम होवत हे। उहां बाहिर ले अवइया डराभर अऊ मजदूर मन एकर फायदा उठावत हें उहें ये धंधा करईया मन बिना डर के बड़ जोर शोर ले दारू बेंचत हें। जानबा हे के दुर्ग के एक युवक अऊ ओखर बाप ठेला म ही दारू पीथें अऊ मनखे मन ल दारू बेंचथें। जानबा हे के उहां दारू डबल रेट बेंचे जाथे। एहू खबर हे के उहां के गोदाम तीर घलोक आसानी ले हमाल मन बर दारू बेंचावत हे। ये दारू बेंचइया मन के बारे म पूरा गांव ल भनक हे फेर कोनों एकर बारे म कुछ बोलत नइ यें। इहां 112 के गाड़ी हर समय तैनात रहिथे तभो ले ये शराब माफिया मन के मन म एकर कोनो भय नइ हे।
गांव वाले मन के कहना हे के एमा पुलिसिया सांठगांठ के अंदेशा हे
अभी हाले म क्षेत्रीय जनपद सदस्य ह दुर्ग के एक युवक ल रसमड़ा के रायपुर स्टील के आगू दारू बेचत पकड़े रहिस। ओकर तिर 10 पव्वा मिलिसि त वोला छोटे धारा लगाके कार्रवाई करे गीस। जानबा हे के आबकारी नीति शिथिल होए के सेती दारू कोचिया मन एकर फायदा उठावत हें। कई झन मनखे ठेला म साग-भाजी या भजिया-बड़ा के धंधा करत दारू बेंचे के काम घलोक करत हें। गांव वाले मन के बताती लॉकडाउन के बेरा म इहां जमके अवैध दारू दुगुना-चौगुना रेट म बेचावत रहिस अऊ आज तक ए मा कोई कार्रवाई नइ होए हे, जेखर से गांव वाले मन म आक्रोश हे।
इहां ले आठ किलोमीटर दूरिहा म पुलिस चौकी अंजोरा स्थित हे फेर पुलिस के शराब कोचिया मन ल कोनो खौफ नइ हे। पुलिस चौकी अंजोरा दारू के अवैध बिकरी उपर लगाम नइ लगा पावत हे। गांव वाले मन के बताती दुर्ग के शराब कोचिया बाप-बेटा मन हुज्जत गिरी करथें, इमन काकरो सुनय नहीं अऊ कथें के जऊन करना हे कर लो। उपसरपंच नंद कुमार साहू ह चिंता करत कहिस के ए प्रकार गांव म आसानी ले शराब मुहैया होए म गांव म अराजकता के माहौल पैदा हो गए हे, ये म तुरंत रोक लगना चाही।
(दक्षिणापथ बर रसमड़ा ले गुलाब देशमुख के रपट के छत्तीसगढ़ी अनुवाद)
