धान मिजे के थ्रेसर मशीन म पिसइस मजदूर, दुर्गा विसर्जन बर घर ले निकले रिहिस युवक के दर्दनाक मउत

बलरामपुर, 28 अक्टूबर 2020 । बलरामपुर जिला के सनावल थाना क्षेत्र के ग्राम पंचायत विमलापुर म एक दर्दनाक घटना आगू आय हे। इहा धान के मिजाई करे के बेरा म एक मजदूर थ्रेसर मसीन म घुस गे जेखर ले दर्दनाक मउत होगे। मजदूर के नाम बंधू पंडो हे, ओहा घर ले दुर्गा विर्सजन बर निकले रिहिस , लेकिन रस्ता म ओखर पड़ोसी मुंसीराम ओला अपन संग धान मिजाई बर घर लेगे, धान मिजाई के दौरान ही अचानक मजदूर पंडो के हाथ पहली थ्रेसर मसीन म घुस गे अउ देखत देखत ओखर पूरा शरीर थ्रेसर मसीन म घुस गे जेखर ले दर्दनाक मउत होगे। हादसा के बाद ग्रामीण मन के भीड़ जमा होगे । सूचना के बाद पुलिस के टीम घलो मउका म पहुचीस। पुलिस के टीम ह मामला म विवेचना शुरु कर देहे हे । जांच म ये पता चलीस की थ्रेसर मशीन ल एक अप्रशिक्षित ऑपरेटर चलात रिहिस।