बिलासपुर, 29 नवम्बर 2020। महिला डॉक्टर ल बैंक मैनेजर होय के झांसा देके मोबाइल के जरिए एटीपी अऊ ओटीपी नंबर पूछके 87,996 रुपिया के चूना लगइया आरोपी ल बिलासपुर पुलिस ह गिरफ्तार करे हे। आरोपी ल साइबर सेल के मदद ले ऑनलाइन ठगी बर प्रसिद्ध झारखंड के जामताड़ा जिला ले धर दबोचीस हे। जानकारी के अनुसार, नर्मदा नगर, सिविल लाइन थाना निवासी 48 वर्षीय डॉ. बीना सिंह पति तीर्थेश्वर सिंह ह 15 सितंबर 2018 के रिपोर्ट दर्ज कराय रिहिस। जेमा अज्ञात आरोपी ह मोबाइल फोन म अपन आप ल बैंक ऑफ बड़ौदा के मैनेजर बतात हुए वेरिफिकेशन के नाम म एटीएम कार्ड के एटीपी नंबर पूछे के बाद ओटीपी नंबर पूछिस। शक होय म महिला ह तत्काल बैंक शाखा म जाके जानकारी लिस त खाता ले अज्ञात व्यक्ति द्वारा 87,996 रुपिया के ट्रांसफर होय के जानकारी मिलिस, महिला ह सिविल लाइन थाना म रिपोर्ट दर्ज कराय रिहिस।
