–सिविल लाइन ले दादा-दादी नाना-नानी पार्क के बीच पंथी, सुआ अऊ राऊत नाच के झांकी, सुरुज नमस्कार के कई ठन आसन मन के आकर्षक प्रतिमा घलोक
दुर्ग, 2 दिसंबर 2020। मुख्यमंत्री श्री भूपेश बघेल ह आज दुर्ग म छत्तीसगढ़ी लोककला मार्ग के लोकार्पण करिन। शहर के सिविल लाइन ले दादा-दादी नाना-नानी पार्क के बीच के सड़क ल छत्तीसगढ़ी लोकनृत्य पंथी, सुआ अऊ राऊत नाच के छटा बिखेरत आकर्षक मूर्ति मन ले सजाए गए हे। सड़क के पाई म सुंदर लैंड स्केपिंग के बीच चाक चलात कुम्हार अऊ हल चलात किसान के घलोक प्रतिमा लगाए गए हे। सड़क ल नवा रंग-रूप देके पैदल चलइया मन बर फुटपाथ घलोक बनाए गए हे। मनखे मन ल सेहतमंद बनाए अऊ मानसिक-शारीरिक रूप ले फिट रहे बर प्रेरित करे बर सुरुज नमस्कार के कई ठन आसन मन ल घलोक उहां प्रदर्शित करे गए हे। लोकार्पण कार्यक्रम म लोक निर्माण मंत्री श्री ताम्रध्वज साहू, कृषि मंत्री श्री रविन्द्र चौबे, छत्तीसगढ़ वेयर हाउस कार्पोरेशन के अध्यक्ष श्री अरूण वोरा, महापौर श्री धीरज बाकलीवाल अऊ नगर निगम के सभापति श्री राजेश यादव घलोक सामिल होइन।
छत्तीसगढ़ी लोककला अऊ संस्कृति ले रद्दा रेंगइया मन ल परिचित करात दुर्ग शहर के बीचों-बीच करीब आधा किलोमीटर के ये छत्तीसगढ़ी लोककला मार्ग ल करीबन 58 लाख रूपिया के लागत ले आकर्षक रूप दे गए हे। नगर निगम अऊ स्थानीय विधायक श्री अरूण वोरा के विधायक निधि ले इहां प्रदेश के सांस्कृतिक विरासत के झलकी मन ल प्रदर्शित करे गए हे। उहें नगर निगम कोति ले सुरुज नमस्कार के कई ठन मुद्रा मन ल प्रदर्शित करत मूर्ति मन ल तको लगाए गए हे।
