बेमेतरा, 10 दिसम्बर 2020। दहेज बर प्रताड़ित करे के मामला म पति अऊ सास-ससुर ल पुलिस ह गिरफ्तार करके जेल भेज देहे हे। नवविवाहिता के संदिग्ध मउत होय के बाद मृत युवती के मईके वाले मन ह ससुराल पक्ष के खिलाफ आरोप लगाए रिहिस। मामला बेमेतरा जिला के दाढ़ी थाना क्षेत्र के ग्राम बंदी के हे, जिहा 2 साल पहली 22 वर्षीय नवविवाहिता ऋतु साहू के शादी होय रिहिस। ऋतु साहू के 6 दिसंबर के संदिग्ध अवस्था म मउत हो गए रिहिस। जेमा मृतक के मईके वाले ह ससुराल पक्ष के ऊपर दहेज बर प्रताड़ित करे अऊ आत्महत्या करे उकसाय के आशंका जताय रिहिस। उहें मामला के गंभीरता ल देखत हुए। पुलिस ह शार्ट पोस्टमार्टम रिपोर्ट मिले के बाद पुलिस ह मामला म धारा 304 बी, 498 ए, 201, 34 भादवि के तहत मामला दर्ज करके विवेचना म लेहे हे। उहें मईके वाले के बयान के बाद आज दहेज बर प्रताड़ित करइया पति नूनकरण साहू, सास परनिया साहू अऊ ससुर हीरामणि साहू ल पुलिस ह गिरफ्तार करके जेल भेज देहे हे। एखर संग हत्या बर उकसाय अऊ छुपाय के तहत मामला दर्ज करे हे।
गुरतुर गोठ बर- भीषम वर्मा
