बिलासपुर, 17 दिसम्बर 2020। कोटा विकासखंड स्थित कुरदर ले बगधर्रा व्हाया सरगोढ़ सड़क प्रधानमंत्री ग्राम सड़क योजना ले बनाए गए हे। ये सड़क के बने ले एतराब के मनखे मन ल जीवन के सबले बड़े सुविधा मिले हे। अब गांव वाले मन के कई मील के सफर आसान हो गए हे।
ये सड़क अचानकमार टाइगर रिजर्व क्षेत्र के बफर जोन म स्थित हे। आदिवासी बैगा बाहुल्य क्षेत्र सरगोढ़, उमरिया, बगधर्रा, चांटीडांड़, भलवाही, खोंगसरा कुल 6 बसाहट के कुल 1405 जनसंख्या ल मुख्य मार्ग ले जोड़े बर ये एकमात्र सड़क हे। ये सड़क के बने के पहिली ये क्षेत्र के ग्रामीण मुख्यधारा ले कटे गए रहिन। 20 किमी. लंबा सड़क म 2 बड़का नाला हे जेमा सड़क निर्माण के संग 2 डब्बा कल्वर्ट के निर्माण कराए गए हे, एखर अलावा 20 किमी. सड़क म 6.50 किमी. लंबा संकीर्ण घाट तको परथे।
जब सड़क नइ बने रहिस त ये क्षेत्र के निवासी मन दुर्गम अऊ कठिन रस्ता ले साप्ताहिक बाजार बर आना-जाना करत रहिन। खोंगसरा ग्राम पंचायत के साप्ताहिक बाजार म दैनिक उपयोगी वस्तु लेहे बर गांव वाले मन ल एक दिन पहिली 17-18 किमी. पैदल चलके घाट, नाला ल पार करके करीबन 8-10 घंटा सफर तय करके खोंगसरा तक आना परत रहिस। एखर चलते मनखे मन ल चिकित्सा सुविधा घलोक मुहैया नइ हो पात रहिस।
कभू दूभर लगइया ये रस्ता अब ये क्षेत्र के निवासी मन बर वरदान बन गए हे। अब गांव वाले मन बर, एक घंटा ले घलव कम समय म नजदीकी हाट बाजार अऊ अस्पताल पहुंचना आसान हो गए हे। नरवा मन म बने पुल-पुलिया, घाट म बने सुरक्षित सड़क मनखे मन के जीवन ल सरल बना देहे हे।
