कवर्धा, 26 दिसम्बर 2020। ओडिशा के ज्वेलरी शॉप ले करीब डेढ करोड़ रुपिया के जेवरात चोरी करके मौज करत दु आरोपी ल पुलिस ह गिरफ्तार करे म सफलता हासिल करे हे। आरोपी मन ह जेल म रहे के दौरान ही चोरी के योजना बनइस अऊ करोड़ों के सोना पार कर दिस। लेकिन चोर मन ह अपन घर कवर्धा वापस आके उही पइसा ले नवा कार खरीद के बड़का गलती कर दिस। इही गलती ह ओला दोबारा जेल पहुंचा दिस। पुलिस एखर कब्जा ले नगदी समेत सिर्फ 38 लाख रूपिया ही रिकवर कर पाइस।
पुलिस के मुताबिक ओडिशा के बेरहमपुर जिला के बड़ापारा थाना स्थित ज्वेलरी शाॅप म अक्टूबर महीना म करीब एक करोड़ 50 लाख रुपिया के कीमती सोना के जेवर चोरी करे जाय के रिपोर्ट दर्ज कराई गए रिहिस। जांच के दौरान मिले क्लू के आधार म कवर्धा पुलिस ले संपर्क करे गिस। पुलिस ह संदेही अऊ आदतन निगरानी चोर लोकेश श्रीवास ले पूछताछ करे गिस। लोकेश पहली घलो चोरी के मामला म 4 बार जेल, एक वर्ष के जिला बदर अऊ अभी जमानत म रिहा होय के बाद कवर्धा शहर म रहत रिहिस। लोकेश श्रीवास ह पूछताछ के दौरान ओडिशा अपन संगवारी लोकेश राव निवासी कुर्सीपार भिलाई के संग मिल के जेवरात चोरी करके कबूल कर लेहे हे। लोकेश राव के संघ दुर्ग जेल म रहे के दौरान घटना के योजना बनइस। चोरी करे गए कुछ सोना के जेवर ल उत्तरप्रदेश राज्य म बेच दिस अऊ कुछ जेवर ल अपन पास रखे रिहिस। एखर संग ही उही पइसा ले एक नवा अर्टिका कार खरीदे रिहिस। आरोपी के निशानदेही म लोकेश राव के कब्जा ले सोना के 169 ग्राम जेवर, 12 लाख 60 हजार नगदी, अर्टिका कार अऊ 2 नग मोबाइल बरामद करे गए हे। जेखर कुल कीमत 38 लाख रूपिया। बाकी पइसा या जेवरात कहां हे एखर पता लगाय जावत हे। फिलहाल ओडिशा पुलिस ह दुनों ल कवर्धा ले गिरफ्तार करके ट्रांजिट रिमांड म ले गए हे।
गुरतुर गोठ बर- भीषम वर्मा
