बीजापुर, जिला के बीजापुर ब्लाक अंतर्गत ग्राम मिड़ते निवासी आदिवासी किसान शिवराम गाथा उन्नत खेती-किसानी करके परिवार ल खुशहाल बनावत हे। करीबन 4 एकड़ कृषि जमीन के मालिक शिवराम ह धान के आधुनिक खेती के संगेच खेत तीर ले बोहइया नाला के पानी के सिंचाई करके साग-सब्जी उत्पादन ल आय के अकतहा जरिया बनाए हे। अभी हाल ही म शिवराम ले ऊंखर खेते म भेंट होइस त वो बताइस के 4 एकड़ कृषि जमीन म ले 3 एकड़ रकबा म 1010, एचएमटी, स्वर्णा प्रजाति के धान के फसल लेवत हे। धान के अच्छा उत्पादन मिलय, ये दृष्टिकोण ले वो ह श्रीविधि पद्धति ले रोपा लगाथे अऊ कृषि विभाग के मैदानी अमला ले हमेशा परामर्श लेत रहिथे। उहें एक एकड़ रकबा म साग-सब्जी के खेती करत हे, जेमां कृषि विभाग के सहायता ले स्थापित सोलर पंप ले नाला के पानी ले सिंचाई करत हे।
शिवराम ह बताइस के बीते साल धान के फसल बढ़िया होए के सेती 36 क्विंटल धान के विक्रय समर्थन मूल्य म करे रहिस अऊ फसल ऋण के 26 हजार रूपिया लेम्पस म जमा करिस। उहें बांचे राशि के उपयोग घरेलू काम मन म करिस। वो ह राज्य शासन के 2500 रूपिया प्रति क्विंटल समर्थन मूल्य म धान उपार्जन के प्रशंसा करत बताइस के अंतर के राशि ल राजीव गांधी किसान न्याय योजना के जरिये सीधा बैंक खाता म अंतरित करे ले किसान मन ल खेती-किसानी अऊ परिवार के जरूरत ल पूरा करे म सहूलियत हो गीस। ये साल अतिवृष्टि के सेती धान के उत्पादन कम होए के बात कहत शिवराम ह बताइस के अभी 26 क्विंटल धान लेम्पस म विक्रय करे हे। ये कमी के भरपाई साग-सब्जी उत्पादन ले करे के बाना शिवराम ह उठाए हे अऊ अभी रबी म टमाटर, मिर्च, बैंगन, मटर, गोभी, आलू, प्याज, कद्दू संग लालभाजी-मेथी, धनिया आदि के फसल लेवत हे। करीबन आधा एकड़ रकबा म चना के बुआई तको करे हे। शिवराम बताथे के बीते साल करीब 58 हजार रूपिया के साग-सब्जी के विक्रय स्थानीय बाजार म कर वो ह करे रहिस। ये साल घलोक अच्छा उत्पादन के सहारे उम्मीद के मुताबिक आमदनी अर्जित होही। अपन पत्नी प्रेमबत्ती के संग खेती-किसानी करे बर कड़क मेहनत करइया आदिवासी किसान शिवराम खेती-किसानी ले परिवार ल खुशहाली कोति आगू करत हे अऊ अपन लइका मन के पढ़ाई के प्रति सजग हे। शिवराम ह बताइस के खेती-किसानी के आमदनी ले निजी अंगरेजी माध्यम स्कूल दुगोली म बड़े बेटी सुमित्रा ल 7वीं अऊ बेटा सुनील ल 3री म पढ़ावत हे।
