उत्तर बस्तर कांकेर, जमीन के मालिकाना हक मिले ले किसान खम्मनसिंह नेताम के जीवन म खुसी के बहार आ गए हे। वोखर पिता ह पहिली छोटे झाड़ के जंगल के जमीन ल काबिज करके खेती करत रहिस, जेखर मालिकाना हक वोला मिल गए हे। मुख्यमंत्री श्री भूपेश बघेल के सरकार ह ओ ला वन अधिकार मान्यता पत्र प्रदान करे हे। कृषक खम्मनसिंह नेताम ह मुख्यमंत्री श्री बघेल के प्रशंसा करत कहिस के राज्य सरकार ह वन जमीन म कई बछर ले काबिज मनखे मन ल जमीन के मालिकाना हक प्रदान करे के योजना लागू करे हे, जेखर फलस्वरूप मोला 1.02 हेक्टेयर जमीन के वनाधिकार पट्टा मिले हे, एखर से मोर चिंता दूर हो गीस, अब मोला बेदखली के डर नइ हे। वो ह बताइस के वनाधिकार पट्टा मिले के संगेच मैं आधुनिक खेती करके अपन आमदनी म बढ़ोतरी करत हंव।
कांकेर जिला के नरहरपुर विकासखण्ड के ग्राम देवगांव के फिरंगीपारा निवासी भूमिहीन कृषक खम्मनसिंह ह प्रदेश के मुख्यमंत्री श्री भूपेश बघेल के सराहना करत कहिस के वोखर पूर्वज मन ये जमीन म कई साल पहिली ले खेती करत रहिन, फेर मालिकाना हक नइ मिले ले चिंता बने रहय, अब मोर चिंता दूर हो गए हे। वो ह बताइस के ये जमीन म रोजगार गारण्टी योजना के तहत 02 लाख 30 हजार रूपिया के लागत ले डबरी निर्माण कराए गए हे अऊ कुछ राशि कर्ज लेके करीबन 01 लाख रूपिया खर्च करके नलकुप खनन घलोक करवाए गए हे, जेमां 1.50 एचपी के मोटर पंप लगाके डबरी म पानी भरे के काम करे जात हे, एखर अलावा फसल के सिंचाई तको करे जात हे। खम्मनसिंह ह बताइस के बोर के पानी ले सब्जी उत्पादन घलोक करे लगे हे, जऊन ल दैनिक उपयोग के बाद बांचे सब्जि मन ल बेंचत घलोक हे, खेत के मेड़ मन म अरबी, केला अऊ देशी सब्जि लगाए हे, जेखर से ओकर आर्थिक आमदनी म बढ़ोतरी होवत हे। वोकर बताती वो ह 1.02 हेक्टेयर जमीन के मालिकाना हक मिले ले दू फसली खेती करत हे, पाछू साल खरीफ अऊ रबी फसल के धान ल बेचे ले 70 हजार रूपिया के आमदनी घलोक वोला होय रहिस। ये साल खेत मन म नर-नारी अऊ बलवान धान ल आधुनिक पद्धिति ले रोपाई करे हे।
कृषक खम्मनसिंह नेताम ह मछली पालन के काम घलोक करत हे, करीबन छः महिना पहिली मृगल, रोहू अऊ कतला आदि मछली मन के 05 किलो बीज डबरी म डारे हे, जेला रोजेच भोजन के रूप म दाना देहे जात हे। वोकर बताती मछरी मन अब बाढ़के बिक्री के लइक हो गए हे, वोला भरोसा हे के मछरी मन के बेचे ले घलोक ओ ल बनेच आमदनी होही। मुख्यमंत्री श्री भूपेश बघेल के किसान मन के हित म करे जात काम मन के प्रशंसा करत खम्मनसिंह ह बताइस के वो ह खेती-किसानी बर 16 हजार रूपिया के कर्ज ले रहिस, जऊन ल राज्य सरकार ह माफ कर देहे हे। वो ह एहू बताइस के ये साल सहकारी समिति नरहरपुर के माध्यम ले खाद अऊ बीज घलोक कर्ज के रूप म लेहे हे, जेमा यूनिया, डीएपी, राखड अऊ पोटाश खाद मिले हे। कृषक खम्मनसिंह नेताम के कहना हे के जमीन के मालिकाना हक वनाधिकार मान्यता पत्र मिले ले वोखर परिवार के भरण-पोषण के चिंता दूर होए हे, धान के खेती के संगेच सब्जी-भाजी के उत्पादन वो ह करत हे, अब डबरी के निर्माण घलोक हो गए हे। अनाज के व्यवस्था के संगें-ग सब्जी-भाजी के बिक्री ले आर्थिक स्थिति म सुधार आए हे।
