कोरबा, अपन मेहनत के पसीना ले सींच के खेत मन म धान उपजाए के बाद ओला बेचे म होवइया कठिनाई अऊ मशक्कत ले कोरबा जिला के दू हजार 773 किसान मन ल छुटकारा मिल गए हे। मुख्यमंत्री श्री भूपेश बघेल ह प्रदेश के किसान मन ल अपन धान सहकारी समिति मन म समर्थन मूल्य म बेचे बर हर संभव सुविधा देहे गए हे। कोरबा जिला म राज्य शासन ह पाछू दू बछर म 14 नवा सहकारी समिति अऊ सात नवा उपार्जन केन्द्र शुरू करे हे। निरधि, नोनबिर्रा, कुलहरिया, सुमेधा, दादर खुर्द, लबेद अऊ तरईनारा म शुरू ए नवा उपार्जन केन्द्र मन ल मिलाके जिला म अब 49 धान खरीदी केंद्र मन म किसान मन के धान समर्थन मूल्य म खरीदे जात हे। ए नवा धान खरीदी केन्द्र मन के शुरू होए ले किसान मन ल अपन धान बेचे म अड़बड़ सहूलियत हो गए हे। पहिली ओ मन ल अपन मेहनत ले उपजाए धान ल बेचे बर 20 ले 25 किलोमीटर दूर तक जाना परत रहिस। धान ल उपार्जन केन्द्र तक ले जाय बर ट्रैक्टर गाड़ी आदि के व्यवस्था म समय अऊ पइसा दुनों खर्च रहिस। कभू-कभू उपार्जन केन्द्र म धान के आवक जादा होए ले रूकना घलोक परत रहिस। अइसन म राज्य शासन ह किसान मन ल आसानी ले अपन फसल खरीदी केन्द्र मन म बेचे बर पूरा प्रदेश म 260 नवा केन्द्र शुरू करे हे।
इही तारतम्य म कोरबा जिला म पाछू दू बछर म 14 नवा सहकारी समिति अऊ सात नवा उपार्जन केन्द्र खुले हे। अब समिति मन के संख्या 27 ले बढ़के 41 हो गए हे अऊ धान खरीदी केन्द्र 49 हो गए हे। कुलहरिया म खुले नवा खरीदी केन्द्र ले 637, लबेद ले 419, सुमेधा ले 163, निरधी ले 584, दादर खुर्द ले 332, करईनारा ले 285 अऊ नोनबिर्रा ले 353 किसान जुड़े हे। जऊन अब अपनेच गांव तीर धान ल बेचत हें। कोरबा जिला म ये साल पाछू साल के तुलना म धान बेचइया किसान मन के संख्या 27 हजार 694 ले बढ़के 32 हजार 589 हो गए हे। उहें पाछू साल के धान के रकबा 45 हजार 803 हेक्टेयर ले बढ़के 48 हजार हेक्टेयर ल पार कर गए हे। राजीव गांधी किसान न्याय योजना के तहत घलोक जिला के किसान मन ल 67 करोड़ 62 लाख रूपिया के भुगतान चार किश्त म करे जात हे। तीन किश्त म अभी तक किसान मन ल 53 करोड़ 25 लाख रूपिया के राशि मिल गए हे। कोरबा जिला म 23 हजार किसान मन के 118 करोड़ रूपिया के अल्प कालीन कृषि ऋण घलोक माफ करे गए हे। सरकार के ए सहुलियत मन ले किसान मन ल खेती बर जरूरी आदान सामाग्री जइसे बीज, खाद, दवई आदि बर बहुत मदद मिले हे अऊ उंखर खेती-किसानी के प्रति रूझान बाढ़े हे।
सुमेधा गांव के पहिली सरपंच भजन कंवर ह अपन गांव म समर्थन मूल्य म धान खरीदी केन्द्र शुरू होए म खुशी व्यक्त करत कहिस के धान बेचे बर पहिली 22 कि.मी. के दूरी तय करके छुरीकला जाना परत रहिस अऊ अपन पारी के अगोरा तको करना परत रहिस। अब गांवेच म धान खरीदी केन्द्र खुले ले हम सब अड़बड़ खुश हवन। अब अपन धान अपन केन्द्र म समय म बेचत हन। किराया भाड़ा अऊ समय के घलोक बचत हो गए हे। कृषक त्रिभुवन सिंह कंवर अऊ इतवार सिंह कंवर ह ग्राम सुमेंधा म अऊ अमन पटेल अऊ अरूण यादन ह ग्राम दादरखुर्द म समर्थन मूल्य म धान खरीदी केन्द्र खोले बर राज्य सरकार उपर कृतज्ञता प्रकट करत कहिन के हमार गांव के अलावा आसपास के गांव के किसान मन ल अपन उपज बेचे बर अब दूर तक सफर तय नइ करना परय। कृषक मनीराम साहू ह घलोक मुख्यमंत्री श्री भूपेश बघेल ल किसान मन के सहूलियत के ध्यान रखे बर धन्यवाद ज्ञापित करे हे। मनीराम साहू ह कहिस के किसान मन ल सहूलियत देहे के सरकार के उदीम मन ले ही जिला म ये साल धान के रकबा घलोक बाढ़े हे अऊ धान बेचइया किसान मन के संख्या घलोक बाढ़े हे।
