रासायनिक खाद ले जैविक खाद कोति बढ़त हे धमतरी जिला

धमतरी, 13 जनवरी 2021। प्रदेश सरकार के महत्वाकांक्षी सुराजी गांव योजना के तहत नरवा, गरूवा, घुरवा, बाड़ी के विस्तार के संगें-संग धमतरी जिला रोजगारोन्मुखी आयाम कोति बढ़त हे। इही कड़ी म गोधन न्याय योजना धमतरी जिला म न सिरिफ बेरोजगार महिला मन ल संगठित करके समूह मन के संग रोजगार देके आय के स्तर ल बढ़ाए म महत्वपूर्ण भूमिका निभावत हे, अऊ महिला समूह के सदस्य मन के क्रय शक्ति म घलोक बढ़ोत्तरी होवत हे। प्रदेश सरकार के दुनों योजना मन के क्रियान्वयन ले जिला के किसान जैविक खाद्यान्न उत्पादित करके रायायनिक खाद के बेतरतीब उपयोग ल नियंत्रित करे म योगदान देवत हें। कैंसर जइसे लाइलाज बीमारी के वाहक खतरनाक रसायन मन के परयोग के जगा विषरहित जैविक खाद्यान्न के उत्पादन म बढ़ोतरी ले धमतरी जिला के सकारात्मक पहिचान बनत हे।
कभू रासायनिक दवइ अऊ कीटनाशक मन के सबले जादा खपत करईया धमतरी जिला अब जैविक खेती के रकबा म बढ़ोतरी से अभिनव पहल कोति आगू बढ़त हे। रासायनिक उर्वरक के खपत के मामला म धमतरी जिला पंजाब राज्य के औसत खपत ले घलोक जादा हे, फेर छत्तीसगढ़ शासन के महत्वाकांक्षी योजना गोधन न्याय योजना के लागू होए ले केंचुआ खाद के उत्पादन के मामला म अब जिला के पहिचान अलगेच होए लगे हे। उप संचालक कृषि ह बताइस के जिला म कुल 14 हजार 418 पशुपालक मन तीर गौ अऊ भैंसवंशीय दू लाख 96 हजार 508 पशुधन हे। गौठान योजना अऊ गोधन न्याय योजना के लागू होए ले जिला के 370 पंचायत मन म ले 324 गौठान ग्राम मन म ले 176 गौठान ग्राम के 5599 पशुपालक मन ल सरलग गोबर दू रूपिया प्रति किलोग्राम के दर ले खरीद के केचुआ खाद निर्माण बर महिला समूह मन ल देहे जात हे। उमन बताइस के 20 जुलाई 2020 ले 09 जनवरी 2021 तक 5599 पशुपालक मन ले एक लाख 88 हजार 88 क्विंटल 14 किलोग्राम गोबर के खरीदी करइया हे। खरीदे गए गोबर ले 2100 पक्का वर्मी टांका अऊ 433 लो-कास्ट तकनीक ले बनाए टांका मन म नियमित रूप ले भरके वेस्‍ट डिकम्पोजर ले उपचार के बाद केंचुआ डालके कुल 1053.75 क्विंटल वर्मी कम्पोस्ट के उत्पादन कर डरे हें। एमां ले 505.51 कुंटल वर्मी कम्पोस्ट के क्रय करके कृषि, उद्यानिकी अऊ आन विभाग गेहूं, रागी, चना अऊ आन कृषक फसल प्रदर्शनी मन म उपयोग करे जात हे। संगेच सहकारी समिति मन के माध्यम ले नगद परमिट म 391 किसान मन कोति ले चार लाख 21 हजार 624 रूपिया के उठाव करे जा चुके हे।