वर्षा ह करिस छत्तीसगढ़ के नाम विश्व स्तर म रौशन, मिलीस गोल्डन बुक ऑफ वर्ल्ड रिकार्ड के प्रमाण पत्र

रायपुर, 19 जनवरी 2021। अपन हुनर ले अपन नाव आगू रोशन करईया मंदिर हसौद के कुमारी वर्षा वर्मा ल आज नगरीय प्रशासन मंत्री डॉ.शिवकुमार डहरिया के आगू गोल्डन बुक ऑफ वर्ल्ड रिकार्ड के प्रमाण पत्र मिलीस। वर्षा ह पैरा अऊ धान बीज के माध्यम ले 10 अप्रेल 2020 के छत्तीसगढ़ महतारी के सुग्‍घर फोटू बनाए रहिस। वर्षा के ये फोटू ल विश्व स्तर म सम्मान मिलीस अऊ गोल्डन बुक ऑफ वर्ल्ड रिकार्ड ह ओकर नाव दर्ज करिस। गोल्डन बुक ऑफ वर्ल्ड रिकार्ड के अधिकृत संवाददाता श्रीमती सोनल राजेश शर्मा ह मंत्री डॉ. डहरिया के आगू ऊंखर सरकारी कार्यालय म कु. वर्षा ल प्रमाण पत्र प्रदान करिस। ये बेरा म मंत्री डॉ. डहरिया ह वर्षा के उज्ज्वल भविष्य के कामना करत कहिन के वर्षा ह विश्व स्तर म मंदिर हसौद भर नहीं छत्तीसगढ़ के गौरव बढ़ाए के काम करे हे। वो ह छत्तीसगढ़ महतारी ल पैरा आर्ट के माध्यम ले जऊन प्रकार ले प्रस्तुत करे हे वो सिरतोन म तारीफ के काबिल हे। उमन वर्षा अऊ मौका म उपस्थित वोखर माता श्रीमती सीमा वर्मा संग परिजन मन ल ये उपलब्धि उपर बधाई घलोक दीन। वर्षा ह बताइस के वो गर्ल्स डिग्री कालेज म बीएससी कम्पयूटर साइंस के छात्रा हे अऊ 2013 ले पैरा आर्ट के माध्यम ले अलग-अलग महापुरुष संग आन आकृति बनाथे।