पंचायत मंत्री श्री सिंहदेव के मौजूदगी म संचालक, पंचायत अऊ आईसीआईसीआई बैंक के पूर्वी जोन के प्रमुख ह एमओयू म करिस दस्कत
रायपुर, 8 फरवरी 2021। पंचायत अऊ ग्रामीण विकास विभाग ह आईसीआईसीआई बैंक के सहयोग ले प्रदेश के हरेक ग्राम पंचायत ले जुड़े जानकारी अऊ आंकड़ा ल सकेल के ओला डिजिटाइजेशन करही। विभागीय मंत्री श्री टी.एस. सिंहदेव के मौजूदगी म आज ऊंखर निवास कार्यालय म पंचायत विभाग के संचालक श्री मोहम्मद कैसर अब्दुल हक अऊ आईसीआईसीआई बैंक के पूर्वी जोन के प्रमुख श्री प्रवीण त्रिवेदी ह ये संबंध म एमओयू उपर हस्ताक्षर करिन। एमओयू के तहत आईसीआईसीआई बैंक पंचायतीराज संस्था मन म सूचना तकनीक अधोसंरचना विकास (IT Infrastructure Development) बर घलोक काम करही।
पंचायत अऊ ग्रामीण विकास मंत्री श्री सिंहदेव ह कार्यक्रम म आईसीआईसीआई बैंक के प्रति आभार व्यक्त करत कहिन कि गांव ले जुड़े जानकारी अऊ आंकड़ा ल सकेलना अऊ वोकर डिजिटाइजेशन करे ले योजना मन के क्रियान्वयन के फीडबैक अऊ गांव वाले मन के जरूरत मन के बारे म लऊहे जानकारी मिल सकही। मनखे मन के आमदनी, आर्थिक स्तर, परिवार अऊ कल्याणकारी योजना मन ले उंकर माली स्थिति म सुधार संबंधी सटीक जानकारी मिले ले ऊंखर बर उपयोगी योजना बनाए बर घलोक एखर से काफी सहायता मिलही। उमन कहिन कि हर ग्राम पंचायत म सालाना कम से कम 70 लाख रूपिया ले एक करोड़ रूपिया तक के काम कराना शासन के लक्ष्य हे। ग्रामीण अर्थव्यवस्था के मजबूती अऊ मनखे मन के आर्थिक सशक्तिकरण बर सरकार कोसिस करत हे कि हर एक परिवार ल कम से कम कलेक्टर दर के बराबर आमदनी होवय जेखर से कि उंखर पारिवारिक, आर्थिक अऊ सामाजिक स्थिति बेहतर हो सकय।
एमओयू के तहत ग्राम पंचायतों, ग्रामीण परिवार, उंखर आमदनी, आमदनी बढ़ाय बर मनखे मन के अपेक्षा अऊ सरकार के योजना मन के असर जइसे जानकारी मन ल अऊ आंकड़ा के संकलन, डिजिटाइजेशन अऊ आईटी अधोसंरचना विकसित करे बर आईसीआईसीआई बैंक काम करही। एखर बर चार करोड़ रूपिया के वित्तीय सहायता बैंक कोति ले उपलब्ध कराए जाही। एमओयू म हस्ताक्षर के मौका म पंचायत अऊ ग्रामीण विकास विभाग के सचिव श्री प्रसन्ना आर. अऊ बहुत अकन विभागीय अधिकारी मौजूद रहिन। आईसीआईसीआई बैंक के छत्तीसगढ़ प्रमुख श्री रामकृष्ण कुमार संग बैंक के कई अधिकारी घलोक ये दौरान उपस्थित रहिन।
