छत्तीसगढ़ महिला आयोग के काम ल राष्ट्रीय स्तर म सहराए गीस

मुख्यमंत्री श्री भूपेश बघेल ह अध्यक्ष डॉ. श्रीमती किरणमयी नायक ल दीन बधाई
रायपुर, 11 फरवरी 2021। कोरोना संकट काल के समय छत्तीसगढ़ राज्य म महिला मन ल न्याय देवाए के उददेश्य ले छत्तीसगढ़ राज्य महिला आयोग के काम मन ल राष्ट्रीय स्तर म सहराये गए हे। राष्ट्रीय महिला आयोग ह छत्तीसगढ़ राज्य महिला आयोग ल ओखर उल्लेखनीय काम बर अलंकरण अउ प्रशस्ति पत्र भेंट कर के सम्मानित करे हे। मुख्यमंत्री श्री भूपेश बघेल ह काली अपन निवास कार्यालय म सौजन्य भेंट बर आए छत्तीसगढ़ महिला आयोग के अध्यक्ष डॉ. श्रीमती किरणमयी नायक अऊ उंखर टीम ल ए उपलब्धि बर बधाई अऊ शुभकामना दीन।
मुख्यमंत्री श्री बघेल ले मुलाकात के समय अध्यक्ष डॉ. किरणमयी नायक ह बताइस कि छत्तीसगढ़ राज्य महिला आयोग ह कोरोना संक्रमण काल के समय राज्य के 27 जिला मन म कुल 47 जनसुनवाई करिस अऊ लगभग 1100 महिला मन ले संबंधित मामला ल सज्ञान म लेके ओ मन ल न्याय अउ राहत देहे के उल्लेखनीय पहल करिस। उमन बताइन कि राष्ट्रीय महिला आयोग ह छत्तीसगढ़ म महिला मन ल न्याय अऊ राहत पहुंचाए के मामला म राज्य महिला आयोग के काम मन के सराहना करत एला आन राज्य मन बर अनुकरणीय बताए हे। ए अवसर म स्कूल शिक्षा मंत्री डॉ. प्रेमसाय सिंह टेकाम, विधायक श्री कुलदीप सिंह जुनेजा, पंडरिया के विधायक श्रीमती ममता चंद्राकर संग आन गणमान्य मनखे उपस्थित रहिन।