मुख्यमंत्री श्री बघेल ले स्व. श्री चन्दूलाल चन्द्राकर मेमोरियल मेडिकल कॉलेज के अभिभावक मंडल ह करिस सौजन्य मुलाकात

रायपुर, 12 फरवरी 2021। मुख्यमंत्री श्री भूपेश बघेल ले काली संझा ऊंखर निवास कार्यालय म स्व. श्री चन्दूलाल चन्द्राकर मेमोरियल मेडिकल कॉलेज के पढ़ईया लईका मन के अभिभावक मंडल ह सौजन्य मुलाकात करिन अऊ ये मेडिकल कॉलेज ल अधिग्रहण करके शासकीय करे के घोषणा उपर मुख्यमंत्री श्री बघेल के प्रति आभार जताइन।
आप मन जानतेच हव कि मुख्यमंत्री श्री बघेल ह हाले म स्वर्गीय श्री चन्दूलाल चन्द्राकर के पुण्यतिथि के अवसर म दुर्ग जिला के कचान्दुर म आयोजित कार्यक्रम म ओ मेडिकल कॉलेज के अधिग्रहण के घोषणा करे रहिन। उमन कहे हें कि जल्दीच ये मेडिकल कॉलेज ल शासकीय मेडिकल कॉलेज बनाए के प्रक्रिया सुरू करे जाही। मेडिकल कॉलेज म पढ़ईया लईका मन के अभिभावक मन म डॉ. बसंत अंचल, श्री कमल सिंह डहरिया, श्री सुजीत गुप्ता, श्री छत्तर सिंह सलूजा, डॉ. रूपल पुरोहित, श्री से.एल. जांगड़े, श्री आर.के. शुक्ला संग आन अभिभावक उपस्थित रहिन।