रायपुर, 12 फरवरी 2021। बैंकिंग सेवा के कमी वाले इलाका मन म अब गांव अऊ हाट-बाजार म ही नगद निकासी के सुविधा मिलही। छत्तीसगढ़ राज्य ग्रामीण बैंक मोबाइल एटीएम वेन के माध्यम ले ये सुविधा प्रदान करही। पंचायत अऊ ग्रामीण विकास मंत्री श्री टी.एस. सिंहदेव ह आज नाबार्ड के वित्तीय सहायता ले छत्तीसगढ़ राज्य ग्रामीण बैंक कोति ले तियार छै मोबाइल एटीएम वेन ल हरी झंडी देखाके रवाना करिन। गांव वाले मन ल नगद निकासी के सुविधा स्थानीय स्तर म ही उपलब्ध कराए बर बैंक कोति ले सरगुजा, कोरिया, बस्तर, रायपुर, रायगढ़ अऊ राजनांदगांव जिला म एक-एक मोबाइल एटीएम भेजे जाही। बैंकिंग सेवा अऊ एटीएम के कमी वाले दूरस्थ क्षेत्र मन म ये मोबाइल एटीएम मौजूद रइही जेखर से मनखे मन ल नगद बर दूरिहा म स्थित बैंक या एटीएम तक जाना नइ परे। एखर से गांव वाले मन ल अपन खाता ले छोटे-छोटे रकम के निकासी बर घेरी-बेरी बैंक या एटीएम तक आए-जाए म लगइया समय, श्रम के संगेच धन के बचत होही।
रायपुर स्थित एक निजी होटल म आयोजित मोबाइल एटीएम वेन के लोकार्पण कार्यक्रम ल संबोधित करत होइन पंचायत अऊ ग्रामीण विकास मंत्री श्री टी.एस. सिंहदेव ह कहिन कि नवा तकनीक अऊ मशीनरी के उपयोग ले जनसुविधाएं दूरस्थ अंचल अऊ मनखे मन के घर तक पहुंचत हे। आज लोकार्पित मोबाइल एटीएम ले मनखे गांव म ही अपन जरूरत के नगद राशि निकाल सकत हें। जइसे राज्य शासन के मुख्यमंत्री हाट-बाजार क्लीनिक योजना अऊ मुख्यमंत्री स्लम स्वास्थ्य योजना मनखे मन ल ऊंखर घर के तीर म ही स्वास्थ्य सेवा मुहैया करावत हे, वइसनहे ‘आपका बैंक आप मन के द्वार’ के ध्येय के संग शुरू ये सेवा मनखे मन ल ऊंखर गांव म ही नगद निकासी के सुविधा प्रदान करही।
अस्पताल के जइसे अब एटीएम घलोक पहुंचत हे मनखे मन के दुवार
