सुपोषण चौपाल बर ग्रामीण महिला मन म उत्साह

बलौदाबाजार, 07 मार्च 2021। कोरोना काल के बाद धीरे-धीरे सामान्य होत जिंदगी के बाद आंगन बाड़ी केन्द्र मन म सुपोषण चौपाल के आयोजन करे गए हे। सुपोषण चौपाल बर स्थानीय गांव वाले अउ महिला मन म भारी उत्साह देखे गए। सुपोषण चौपाल के तहत् स्थानीय जन अउ आंगन बाड़ी कार्यकर्ता मन केन्द्र म कई प्रकार के पौष्टिक खाए के जिनिस ल सजाए रहिन। करीबन 3 हजार लइका मन ल खीर-पुड़ी, गर्भवती माता मन के गोदभराई, 05 ले 06 महिना के लइका मन के अन्नप्राशन कराए गीस। विकासखंड बलौदाबाजार के ग्राम ढनढनी म जिला पंचायत अध्यक्ष श्री राकेश कुमार वर्मा, जिला पंचायत सदस्य अउ सभापति सहकारिता विभाग श्री गोरेलाल साहू, स्थानीय सरपंच अऊ समूह के महिला मन ह अन्नप्राशन, गोदभराई के काम करवाईन। जिला पंचायत के अध्यक्ष ह अपन उद्बोधन म कहिन कि सबो लइका सुपोषित होवयं अऊ माता मन लइका मन के देखभाल बने सहिन करयं अऊ शासन के योजना मन के लाभ सबो ल मिलय। जिला के कई ठन विकासखंड के केन्द्र मन म जिला पंचायत सदस्य, जनपद पंचायत, सदस्य, ग्राम पंचायत के पदाधिकारी मन ह आंगनबाड़ी केन्द्र मन म पहुंच के सुपोषण चौपाल म नान्‍हें लईका मन के अन्नप्राशन कराके ओ मन ल आर्शीवाद दीन अऊ ऊंखर उज्जवल भविष्य के कामना करिन। कोरोना काल के लंबा समय बाद सुपोषण चौपाल के आयोजन ले गांव वाले मन म भारी उत्साह देखे गीस। ये सिलसिला म अगला सुपोषण चौपाल 18 मार्च के होही।