शानदार आतिशबाजी के बीच मुख्यमंत्री श्री भूपेश बघेल ह रोड सेफ्टी क्रिकेट वर्ल्ड सीरीज के करिन शुभारंभ

रायपुर, 006 मार्च 2021। मुख्यमंत्री श्री भूपेश बघेल ह काली छत्तीसगढ़ के राजधानी रायपुर के शहीद वीर नारायण सिंह अंतरराष्ट्रीय क्रिकेट स्टेडियम म रोड सेफ्टी क्रिकेट टी-20 वर्ल्ड सीरीज के शुरुआत करिन। सीरीज के शुभारंभ शानदार आतिशबाजी के संग होइस। मुख्यमंत्री श्री भूपेश बघेल ह रोड सेफ्टी संकल्प उपर हस्ताक्षर करिन अऊ रोड सेफ्टी वर्ल्ड क्रिकेट सीरीज के शुभारंभ के घोषणा करिन। पहिली मैच इंडिया लीजेंड्स अऊ बांग्लादेश लीजेंड्स के बीच होइस। क्रिकेट मैच के शुभारंभ बांग्लादेश अऊ भारत के राष्ट्र-गान के संग होइस। ये क्रिकेट-श्रृंखला के उद्घाटन अवसर म मुख्यमंत्री श्री बघेल ह छत्तीसगढ़ के 02 करोड़ 80 लाख जनता कोति ले ये वर्ल्ड सीरीज म सामिल होवत सबो खिलाड़ी मन के स्वागत करिन। उमन कहिन कि जे ल क्रिकेट के भगवान कहे जाथे वो सचिन तेंदुलकर इहां पहुंचे हे। संगेच म युवराज सिंह, मोहम्मद कैफ, मुनाफ पटेल, वीरेंद्र सहवाग समेत भारतीय अऊ बांग्लादेश के सबो क्रिकेट सितारा इहां पहुंचे हें।
श्री बघेल ह कहिन कि कोरोना महामारी के सेती ले मैदान मन ले खिलाड़ी अऊ स्टेडियम ले दर्शक गायब हो गए रहिन। ये आयोजन कोरोना ले संबंधित सबो प्रोटोकाल के पालन करत आयोजित करे जात हे। एखर ले पहिली उमन मैदान म पहुंचके भारत अऊ बांग्लादेश के खिलाड़ी मन ले मुलाकात करके परिचय प्राप्त करिन अऊ ओ मन ल शुभकामना दीन। मुख्यमंत्री श्री भूपेश बघेल अऊ भारत अऊ बांग्लादेश टीम के कप्तान मन ह क्रिकेट बाल उपर सिग्नेचर घलोक करिन।