अबूझमाड़ परिधान रैंप वॉक प्रतियोगिता के पहला आडिशन पूरा

नारायणपुर, 8 मार्च 2021। वनांचल क्षेत्र के युवक-युवती मन ल मंच प्रदान करे के उद्देश्‍य ले जिला प्रशासन नारायणपुर कोति ले अबूझमाड़ पारंपरिक वेशभूषा प्रतियोगिता (रैंपवॉक) के आयोजन करे जात हे। एखर पहिली आडिशन म 29 भाग लेवईया मन ह भाग लीन। प्रतियोगिता के दूसरा आयोजन 9 मार्च के अऊ मुख्य आयोजन 13 मार्च के माता मावली मेला के मुख्यमंच म करे जाही। प्रतियोगिता म स्थानीय युवक-युवती मन पारंपरिक वेश-भूषा, परिधान अऊ आभूषण मन ले सुसज्जित होके भाग लिहीं।
ये प्रतियोगिता म जूनियर वर्ग म 18 साल ले कम उमर के महिला अऊ 18 साल ले कम उमर के पुरूष अऊ सीनियर वर्ग म 18 साल ले जादा उमर के महिला अऊ 18 साल ले जादा उमर के पुरूष सामिल हो सकत हें। 9 मार्च के आयोजित होवईया आडिशन बर भाग लेवइया बिहनिया 10 ले संझा 5 बजे तक पंजीयन करा सकत हें। भाग लेवइया सादा वेशभूषा म घलोक आडिशन दे सकत हें। ये बेरा म मुख्य कार्यपालन अधिकारी जिला पंचायत श्री राहुल देव अऊ परविक्षा अवधि म जिला के भ्रमण म आये 2019 बैच के भारतीय प्रशासनिक सेवा के अधिकारी सुश्री नम्रता जैन, श्री विश्वदीप, श्री जितेन्द्र यादव, श्री नीलम ललित आदित्य संग जिला प्रशासन के अधिकारी-कर्मचारी अऊ स्थानीय जनप्रतिनिधि उपस्थित रहिन।