रइपुर 15 अप्रैल 2021 बिरस्पत । राज्यपाल सुश्री अनुसुईया उइके ह कहीन कि कोरोना संक्रमण ले बचाव बर जनजागरण म राजनीतिक दल के कार्यकर्ता मन के बड़का भूमिका हवय। उन मन राजनीतिक दल मन के प्रमुख मन ले आग्रह करीन कि वोमन अपन कार्यकर्ता मन के माध्यम ले गांव-गांव म ये बीमारी ले बचाव के उपाय मन के बारे म लोगन ल जागरूक करयं। राज्यपाल आज राज्य म कोरोना संक्रमण के प्रसार के रोकथाम के संबंध म विचार विमर्श बर आयोजित सर्वदलीय वर्चुअल बइठका ल सम्बोधित कर रिहिने। बइठका म मुख्यमंत्री दाउ भूपेश बघेल अउ आने राजनीतिक दल मन के प्रतिनिधि तको उपस्थित रिहिन हे ।
राज्यपाल कहीन कि राज्य म कोरोना संक्रमण के विस्तार ल थाम्हे बर सीमावर्ती महाराष्ट्र राज्य ले आए लोगन मन के जांच करे जाना आवश्यक हवय । उन मन कहीन कि एकर बर राज्य के सीमा म प्रबंध करे जाना चाही अउ क्वारेंटाईन सेंटर बनाए जाना चाही । उन मन रेमडेसीविर इंजेक्शन के उचित उपयोग के बारे म लोगन ल जागरूक करे के जरूरत बताईन । ये महामारी ले निपटना हम सबो के सामूहिक दायित्य अउ कर्तव्य हरे। हम सबो झिन एकजुट होके ये संकट ले उबरे म सहयोग करन । जरूरतमंद लोगन तक राहत अउ सुविधा मन के पहुंचाए म राजनीतिक दल शासन-प्रशासन के संग मिलके काम करयं। दलगत राजनीति ले ऊपर उठके संकट के ये बेरा म मानव जीवन ल बचाए के उदीम करयं।
मुख्यमंत्री दाउ भूपेश बघेल ह कहीन कि राज्य सरकार कोरोना संक्रमण के रफ्तार ल थाम्हे बर हर संभव उपाय करत हावय । शासकीय अस्पताल मन म मरीज मन के निशुल्क इलाज करे जावत हवय । डॉ. खूबचंद बघेल स्वास्थ्य सहायता योजना अउ आयुषमान योजना ले इलाज करवइया लोगन मन उपर कमती ले कमती आर्थिक बोझ परय, एकर बर टेस्ट अउ इलाज के दर निर्धारित करे गे हवय । प्रदेश म ऑक्सीजन के कोई कमी नइ हे ।
उन मन कहीन कि कोरोना ले बचाव बर टीकाकरण अउ टेस्टिंग म छत्तीसगढ़ राष्ट्रीय औसत ले बेहतर स्थिति म हवय । टेस्टिंग के संबंध म उन मन जानकारी दीन कि राष्ट्रीय स्तर जिंहां प्रति 10 लाख म एक लाख 92 हजार 650 टेस्ट करे जावत हवय , उहां छत्तीसगढ़ म प्रति 10 लाख म दू लाख 21 हजार 356 टेस्ट करे जावत हवय। वर्तमान म प्रतिदिन 53 हजार टेस्ट करे जावत हावय।
बइठका म कइयो अकन दल मन के नेता मन ह महत्वपूर्ण सुझाव दीन ।
बइठका म मुख्यमंत्री के सलाहकार श्री विनोद वर्मा, मुख्य सचिव श्री अमिताभ जैन, स्वास्थ्य विभाग के अपर मुख्य सचिव श्रीमती रेणु जी.पिल्ले, मुख्यमंत्री के सचिव श्री सिद्धार्थ कोमल परदेशी, सामान्य प्रशासन विभाग अउ जनसम्पर्क विभाग के सचिव श्री डी. डी. सिंह, संचालक राष्ट्रीय स्वास्थ्य मिशन डॉ. प्रियंका शुक्ला, संचालक स्वास्थ्य श्री नीरज बंसोड़ उपस्थित रिहिन।
