बिलासपुर, कलेक्टर डा.सारांश मित्तर ह होम आईसोलेशन के संबंध म आयोजित कार्यशाला म आज डाक्टर मन ल संबोधित करत कहीन कि अइसे आप सबो बड़का अउ महत्वपूर्ण भूमिका निभावत हौ। आप मन से बात करके मरीज मन के घबराहट अउ चिंता दूर होना चाही। उन मन डाक्टर ल मरीज मन के संपर्क म रहीते उन्कर मनोबल बढ़ाए बर कहीन ।
प्रार्थना भवन, जल संसाधन विभाग प्रांगण म स्वास्थ्य विभाग कोति ले आयोजित कार्यशाला म कलेक्टर ह डाक्टर मन ले होम आईसोलेशन म मरीज मन ल देवइया उपचार के संबंध म विस्तृत चर्चा करीन। दवई ले लेके उपचार तक के जम्मो प्रकिया के जानकारी डाक्टर मन ले लीन। दवई मन के उपलब्धता के तको जानकारी लीन। कोविड मरीज मन बर भाप, पौष्टिक भोजन अउ पानी के महत्ता उपर तको विस्तार ले प्रकाश डालीन। कार्यशाला म सीएमएचओ डा. प्रमोद महाजन, जिला अस्पताल के सिविल सर्जन डा. अनिल गुप्ता, डा. आशुतोष तिवारी, डा. अखिलेश देवरस तको होम आईसोलेशन के संबंध म बताइन।
कार्यशाला म जिला पंचायत के मुख्य कार्यपालन अधिकारी श्री हैरीश एस, एडीएम सुश्री नुपूर राशि पन्ना, डिप्टी कलेक्टर श्रीमती अंशिका पाण्डेय, होम आईसोलेशन के सहायक नोडल अधिकारी डा. समीर तिवारी के संगे —संग जिला के होम आईसोलेशन म मरीज मन के ईलाज अउ निगरानी करइया जम्मोे चिकित्सक मन संघरीन।
