दिल्ली, 11मई 2021। पाछू एक साल म खाए के तेल के कीमत म मनमाने बढ़ोतरी होए हे। अभीन के हाल म मनखे कोरोना के संकट ले जूझत हे तेकरे सेग खाए के तेल के कीमत म बढ़ोतरी होए ले जनता उप्पर दुब्बर ल दू असाढ़ कस हो गए हे। जानबा होए हे के बंदरगाह मन म तेल के भंडार के आवा-जाही के मंजूरी संबंधी कुछु समस्या आ गए रहिस तेखर सेती बजार म तेल के मांग के अनुपात म कमी हो गए रहिस। अब ये समस्या ल दूर कर देहे गए हे अऊ अब तेल के बाढ़े कीमत के लउहे कम होए के संभावना हे।
खाद्य अऊ सार्वजनिक वितरण विभाग के सचिव श्री सुधांशु पांडे ह काली दिल्ली म एक सवाल के जवाब देवत कहिन के सरकार कोति ले खाए के तेल के कीमत के बारीकी ले निगरानी करे जात हे। उमन कहिन के कोविड के सेती मंजूरी संबंधी जांच बर तेल कंटेनर मन बंदरगाह मन म अटक गे हें, अब समस्या के समाधान हो गए हे अऊ लउहे तेल के भंडार बाजार म आ जाही अऊ एखर से तेल के कीमत म खच्चित कमी आही।
खाए के तेल के बाढ़े कीमत होही कमती
