छत्तीसगढ़ के अपन टीका पोर्टल अऊ एप “सीजी टीका” के भूपेश दाऊ करिस शुभारंभ

रायपुर,12 मई 2021। छत्तीसगढ़ के मनखे मन बर कोविड टीका के एप आज मुख्‍यमंत्री श्री भूपेश बघेल ह लॉंच करिस। ए एप के नाम “सीजी टीका” हे एला छत्तीसगढ़ सरकार ह डिज़ाइन करे हे। केंद्र सरकार के एप कोविन के जइसे ही ये एप घलोक हे जेमा सब्बो विकल्‍प हे म ये मा अकतहा दू फ़ीचर अऊ हे। सीजी टीका नाम के ये एप म एक तो हाईकोर्ट के दिशानिर्देश के मुताबिक अनुपातिक आंकडा के विकल्‍प हे अऊ दूसर 18 ले 44 बछर के मनखे मन बर अलग से विकल्‍प हे। ये वेब पोर्टल के लिंक http://cgteeka.cgstate.gov.in हे।
छत्तीसगढ़ सरकार ह ये मा ये सुविधा घलोक देहे हे के जेन मनखे मोबाइल के उपयोग नइ जानय ओ मन सीधा टीका ठीहा म जा के रजिस्टर म पंजीकरण करवाहीं त उहां के हेल्‍प डेस्‍क के कर्मचारी मन ओला एप म दर्ज कर देहीं। जेन हितग्राही मन तीर मोबाइल या नेट कनेक्टिविटी के सुविधा नइ हे। अइसन हितग्राही मन बर पंचायत मुख्यालय, नगरीय निकाय मन के मुख्यालय अऊ नगर निगम मन संग अऊ कई जगा हेल्प डेस्क स्थापित करे जाही। जेमां अइसन हितग्राही मन के पंजीयन करे जा सकही, अइसन सबो हेल्प डेस्क के संबंध म व्यापक प्रचार-प्रसार घलोक करे बर जिला मन ल निर्देशित करे गए हे, ताकि जादा ले जादा मनखे ये सुविधा के लाभ ले सकयं।