- मुख्यमंत्री अऊ स्कूल शिक्षा मंत्री ह सफल पढ़ईया लईका मन ल दीन बधाई
- ये साल कोविड-19 महामारी के सेती भीतरी मूल्यांकन के आधार म परीक्षा परिणाम घोषित
- ये परीक्षा म पुनर्गणना अऊ पुनर्मूल्यांकन के प्रावधान नइ हे
- परीक्षा परिणाम ले असंतुष्ट परीक्षार्थी मन अवईया परीक्षा म श्रेणी सुधार बर सामिल हो सकत हें
रायपुर, 19 मई 2021। स्कूल शिक्षा मंत्री डॉ.प्रेमसाय सिंह टेकाम ह आज छत्तीसगढ़ माध्यमिक शिक्षा मण्डल के हाई स्कूल के मुख्य परीक्षा 2021 के परीक्षा परिणाम वीडियो कॉन्फ्रेसिंग के माध्यम ले ऑनलाईन जारी करिन। परीक्षा म पंजीकृत 4 लाख 67 हजार 261 पंजीकृत परीक्षार्थी मन म ले 6 हजार 168 परीक्षार्थी मन के परीक्षा फार्म अपात्र होए के सेती निरस्त हो गए रहिस। बांचे 4 लाख 61 हजार 093 पात्र परीक्षार्थी मन के परीक्षा परिणाम घोषित करे गीस। एमां 2 लाख 24 हजार 112 बालक अऊ 2 लाख 31 हजार 999 बालिका मन के परीक्षा परिणाम सामिल हे। सबो परीक्षार्थी मन परीक्षा म पास होइन, परीक्षा परिणाम शत-प्रतिशत रहिस।
मुख्यमंत्री श्री भूपेश बघेल अऊ स्कूल शिक्षा मंत्री डॉ.प्रेमसाय सिंह टेकाम ह परीक्षा म सफल सबो परीक्षार्थी मन ल बधाई देवत ऊंखर उज्जवल भविष्य के शुभकामना दीन। ये बेरा म छत्तीसगढ़ माध्यमिक शिक्षा मण्डल के अध्यक्ष डॉ. आलोक शुक्ला, सचिव प्रोफेसर व्ही.के.गोयल संग मण्डल के अधिकारी-कर्मचारी घलोक उपस्थित रहिन।
ये साल कोविड-19 महामारी के सेती 10वीं के परीक्षा निरस्त करत भीतरी मूल्यांकन के आधार म परीक्षा परिणाम घोषित करे गीस। जेन परीक्षार्थी भीतरी मूल्यांकन म सम्मलित नइ होइन ओ मन ल सबले कम उत्तीर्ण अंक देके परीक्षा परिणाम घोषित करे गीस। सबो विद्यार्थी उत्तीर्ण हो गे हें।
उत्तीर्ण परीक्षार्थी मन म 4 लाख 46 हजार 393 छात्र पहिली श्रेणी म उत्तीर्ण होइन। जेन कुल घोषित परिणाम के 96.81 प्रतिशत हे। दूसर श्रेणी म 9 हजार 24 परीक्षार्थी उत्तीर्ण होइन, जेन कुल सामिल परीक्षार्थी मन के 1.96 प्रतिशत अऊ तीसर श्रेणी म 5 हजार 676 परीक्षार्थी उत्तीर्ण होइन, जेन कुल सामिल परीक्षार्थी मन के 1.23 प्रतिशत हे।
पहिली श्रेणी म 95.66 प्रतिशत, दूसर श्रेणी म 2.65 प्रतिशत, तीसर श्रेणी म 1.68 प्रतिशत बालक परीक्षार्थी उत्तीर्ण होइन। अइसनहे पहिली श्रेणी म 97.90 प्रतिशत, दूसर श्रेणी म 1.30 प्रतिशत अऊ तीसर श्रेणी म 0.80 प्रतिशत बालिका मन उत्तीर्ण होइन।
ये साल भीतरी मूल्यांकन के आधार म परीक्षा परिणाम घोषित करे गीस। छत्तीसगढ़ माध्यमिक शिक्षा मंडल कोति ले ये साल प्रावीण्य सूची जारी नइ करे के निर्णय ले गए हे। जेखर सेती प्रावीण्य सूची जारी नइ करे गीस। पुनर्गणना अऊ पुनर्मूल्यांकन के प्रावधान घलोक ये परीक्षा म खतम करे गए हे, जेन परीक्षार्थी अपन परीक्षा परिणाम ले संतुष्ट नइ हे, ओ मन ल आगामी परीक्षा म श्रेणी सुधार बर सम्मलित होए के पात्रता होही।
