बस्तर के हस्तशिल्प ल मिलत हे नवा पहिचान

रायपुर, 1 जून 2021। मुख्यमंत्री श्री भूपेश बघेल के बताए रद्दा म चलत बस्तर जिला प्रशासन कोति ले बस्तर के लोककला, शिल्पकला, संस्कृति, पर्यटन अऊ आन स्थानीय कला मन ल देश-दुनिया मे पहिचान देवाए खातिर नित नवा परयोग करे जात हे। वइसे तो बस्तर आर्ट देश-दुनिया मे पहिलीच ले विख्यात हे, फेर ओखर लाभ स्थानीय कलाकार मन ल कमेच मिल पाथे। बस्तर आर्ट के देस के संगें-संग विदेश मन म घलोक जबरदस्त मांग हे, फेर मार्केटिंग के बारीकी मन के जानकारी नइ होए के सेती शिल्पकार मन ल उंखर मेहनत के उचित दाम नइ मिल पावय।
जानबा हे के ग्रामोद्योग मंत्री गुरू रूद्रकुमार के निर्देशन म आमचो बस्तर के भावना ल केंद्र म रखत जिला प्रशासन नित नवा परयोग करत हे। जेमां महिला समूह ल निर्माण, यूनिक डिजाइन, मार्केटिंग, एकाउंटिंग म प्रशिक्षण देके ओला आकर्षक अऊ बाजार के मांग के मुताबिक समान अऊ वैल्यू एडेड उत्पाद मन के निर्माण करवाए जात हे। अभी हाल म महिला समूह के उत्पाद मन के मार्केटिंग बर ट्राईफेड, बस्तर कला गुड़ी, ट्राइबल टोकनी, लोका बाजार, सॉफ्टवेयर, पंखुड़ी सेवा समिति, अमचो बस्तर बाजार, संग आन संबंधित संस्थान मन ले अनुबंध करवाए गए हे, जेखर अच्छा प्रतिफल घलोक मिलत हे।