कोविड आईसोलेशन वार्ड खुल जाय सें क्षेत्र वासी मन ल मिलही इलाज के सुविधा: श्री अमरजीत भगत

सरगुजा, 2 जून 2021। खाद्य, नागरिक आपूर्ति अऊ उपभोक्ता संरक्षण मंत्री श्री अमरजीत सिंह भगत ह आज सरगुजा जिला के सीतापुर स्थित सामुदायिक स्वास्थ्य केंद्र म 20 बिस्तरीय ऑक्सीजन सहित कोविड आइसोलेशन वार्ड के उद्घाटन करिन। उमन ये दौरान स्वास्थ्य केन्द्र भवन के निरीक्षण करके जांच अऊ चिकित्सा सुविधा के जानकारी लीन। श्री भगत ह कोरोना महामारी काल म अपन जान के परवाह करे बिना मेहनत अऊ लगन ले काम करत डॉक्टर अऊ पैरामेडिकल स्टाफ संग आन कर्मचारी मन के सराहना करिन।
खाद्य मंत्री श्री भगत ह उद्घाटन अवसर म कहिन कि ये सामुदायिक स्वास्थ्य केन्द्र म 20 बिस्तरीय कोविड केयर वार्ड चालू हो जाय ले विकासखण्ड स्तर म ही क्षेत्र के कोविड मरीज मन ल इलाज के सुविधा मिलही। उहें कोरोना ले पीड़ित मरीज मन ल तुरंते ऑक्सीजन सहित बेड उपलब्‍ध हो सकही। उमन अस्पताल के चिकित्सक अऊ स्टाफ के उत्साहवर्धन करिन। श्री भगत ह कहिन के कोरोना संकटकाल म प्रदेश के जनता ल राहत देहे बर राज्य सरकार कोति ले राशनकार्ड धारी मन ल 2 महिना के चावल निःशुल्क देहे जात हे। क्षेत्र के निवासी मन बर घलोक सबो प्रकार के जरूरी मेडिकल उपकरण अऊ जरूरी स्वास्थ्य सुविधा उपलब्‍ध कराए गए हे। उमन मनखे मन ले टीकाकरण कराए के अपील तको करिन। मंत्री श्री भगत ह आजेच एक संक्षिप्त कार्यक्रम म 148 हितग्राही मन ल शिक्षा, स्वरोजगार अऊ बेहतर इलाज बर 12 लाख 90 हजार रूपिया के स्वेच्छानुदान राशि के चेक तको बांटिन।